Psalmen 21

₂Heare, de kening is bliid om jo krêft,

wat ropt er lûd om jo útrêding.

₃Wat syn hert ferlange, joegen Jo him;

wat syn lippen fregen, ha Jo him net ûntkeard;sela

₄want Jo kamen op him ta mei lok en seine,

Jo setten him in fyn gouden kroan op ’e holle.

₅Libben hat er Jo om frege en Jo joegen it him,

fermeardering fan dagen, aloan en alwei.

₆Grut is syn gloarje troch jo útrêding,

heechheid en majesteit ha Jo him mei útrist.

₇Jo besetten him mei segen foar altyd,

Jo makken him bliid mei de freugde foar jo antlit.

₈Want de kening is wis fan de Heare,

troch de geunst fan de Heechste sil er net wifkje.

₉Jo hân sil jo fijannen wol fine allegearre,

jo rjochterhân sil jo haters wol reitsje.

₁₀Jo sille har in gleone oven gelyk meitsje,

as Jo jo antlit sjen litten hawwe.

De Heare sil har yn grime ferdylgje,

in fjoer sil har fertarre.

₁₁Har berntsjes sille Jo fan ’e ierde ferdwaan,

har neiteam út it minsdom weibanne.

₁₂Want, wolle se ferkeard tsjin Jo

en hawwe se wit-wat yn ’t sin,

it slagget harren net.

₁₃Want Jo twinge har op ’e flecht,

Jo mikke mei de bôge op har gesicht.

₁₄Oerein, Heare, yn jo krêft!

Lit ús sjonge en spylje fan jo heldemacht.