Numeri 8

₁De Heare sei tsjin Mozes: ₂Sis tsjin Aäron: Do moatst de lampen sà delsette, dat by alle sân it ljocht foar de ljochter falt. ₃Dat die Aäron en hy sette de lampen sà, dat it ljocht foar de ljochter foel, krekt sa’t de Heare it Mozes hjitten hie. ₄De ljochter mei stander en blomwurk wie in wurkstik fan dreaun goud. Alhiel neffens it model dat de Heare Mozes sjen litten hie, sa hie dy him makke.

₅De Heare sei tsjin Mozes: ₆Set de Leviten apart fan de oare Israeliten en suverje se. ₇Dat suverjen moatsto sà dwaan: Se earst mei suveringswetter besprinkelje. As se har neitiid it hiele lichem skeard hawwe en de klean wosken hawwe, dan binne se rein. ₈Se moatte dan in jonge interbolle nimme mei it moaloffer dat derby heart: fyn moal mei oalje oanmongen. Sels moatsto dan ek in interbolle nimme as sûnde-offer. ₉Lit dan de Leviten foar de tinte fan ’e moeting komme en rop de hiele mienskip fan ’e Israeliten yn gearkomste byinoar. ₁₀Asto dan de Leviten foar de Heare komme litten hast, moatte de Israeliten harren de hannen oplizze. ₁₁Ut namme fan ’e Israeliten moat Aäron harren dan earbiedich oan de Heare opdrage; dêrmei binne se wijd om de tsjinst foar de Heare waar te nimmen. ₁₂Dan moatte de Leviten de beide bollen de hannen op ’e kop lizze; de iene wurdt dan as sûnde-offer en de oare as brânoffer offere om foar de Leviten by de Heare fersoening te dwaan. ₁₃Set dan de Leviten foar Aäron en syn soannen en draach har earbiedich oan de Heare op.

₁₄Sa moatsto de Leviten ôfsûnderje út it folk Israel en sa sille se mines wêze. ₁₅Earst dan meie de Leviten komme om tsjinst te dwaan by de tinte fan ’e moeting, asto se suvere hast en earbiedich oan de Heare opdroegen. ₁₆Want hja binne My folslein ta myn foldwaan jûn út it fermidden fan ’e Israeliten. Foar al wat de memmeskurte it earst ûntslút, foar de earstlingssoannen fan Israel yn it plak, haw Ik har foar Mysels ornearre. ₁₇Want Mines binne alle earstlingssoannen yn Israel, sawol dy fan ’e minsken as dy fan ’e bisten; doe’t Ik alle earstlingssoannen yn Egypte sloech, haw Ik dy Mysels tawijd; ₁₈en de Leviten haw Ik nommen foar alle earstlingssoannen fan ’e Israeliten yn ’t plak. ₁₉Ik haw se Aäron en syn soannen tawiisd, midden út ’e Israeliten, om foar de Israeliten de tsjinst yn ’e tinte fan ’e moeting waar te nimmen en om foar harren fersoening te dwaan. Dan sil de Israeliten dea noch driging mear wanke, as se al te ticht by it hillichdom komme.

₂₀Mozes en Aäron en de hiele mienskip fan ’e Israeliten dienen mei de Leviten krekt sa’t de Heare it Mozes opdroegen hie. Sa dienen se it: ₂₁De Leviten suveren harsels, wosken de klean en Aäron droech har earbiedich oan de Heare op: Hy die foar har fersoening by God en suvere har. ₂₂Dêrnei gongen de Leviten har tsjinst by de tinte fan ’e moeting oan ûnder tafersjoch fan Aäron en syn soannen. Alles wat de Heare Mozes oangeande de Leviten opdroegen hie, sa dienen se it ek.

₂₃De Heare sei tsjin Mozes: ₂₄Foar de Leviten jildt ditte: Wa’t fiifentweintich jier is of âlder, dy moat opkomme om syn tsjinstplicht by de tinte fan ’e moeting te folbringen. ₂₅Mar wa’t fyftich jier is, dy lûkt him werom, hy is frij fan tsjinst. ₂₆Hy mei syn bruorren dan noch wol wat hantlangje en wachthâlde yn ’e tinte fan ’e moeting, mar it gewoane tsjinstwurk is er dan frij fan. Sa moatsto it wurk fan ’e Leviten regelje.