Numeri 4

₁De Heare sei tsjin Mozes en Aäron: ₂Nim ûnder ’e Leviten it tal fan ’e Kehatiten op yn har geslachten en famyljes. ₃Tusken de tritich jier en de fyftich jier, te sizzen allegearre dy’t foar de tsjinst yn ’e beneaming komme om wurk te dwaan by de tinte fan ’e moeting. ₄Dit is it wurk yn ’e tinte fan ’e moeting dat foar de Kehatiten opkomt: de soarch foar it alderhillichste. ₅As it kamp opbrutsen wurdt, geane Aäron en syn soannen deryn, helje it foarkleed del en bedekke dêr de arke mei de ferbûnsakte mei. ₆Dêr lizze se in dekkleed fan fyn lear oer; dêr wer oerhinne spriede se in kleed alhielendal fan blaupoarper, en dan dogge se de draachstokken yn ’e ringen. ₇Oer de tafel fan ’e toanbreaën spriede se in blaupoarperen kleed út; dêr sette se de skûtels, leppels, kommen en drankofferkannen op. ₈Dêr spriede se in donkerread kleed oer, dêr’t se dan wer in tek fan fyn lear oerhinne dogge. Dan dogge se de draachstokken yn ’e ringen. ₉Dan nimme se in blaupoarperen kleed en dogge dat oer de ljochter mei syn lampen, snuters, lekbakjes en oaljekannen, ark, dat se by de ljochter brûke moatte. ₁₀Dan lizze se dy mei alles dat derby heart op in tek fan fyn lear en dogge dat op in draachberje. ₁₁It gouden alter spriede se in blaupoarperen kleed oer en dogge dêr in tek fan fyn lear oer. Dan dogge se de draachstokken yn ’e ringen. ₁₂Fierders nimme se alle guod dêr’t se yn it hillichdom de tsjinst mei dogge, lizze it op in blaupoarperen kleed en dogge der in tek fan fyn lear oerhinne en lizze dat op in draachberje. ₁₃It alter suverje se fan ’e fetlike jiske en spriede der in readpoarperen kleed oer. ₁₄Alle guod dat by de tsjinst dêrop brûkt wurdt, dat lizze se dêrop: de fjoerpannen, foarken, skeppen en offerskalen. ₁₅As Aäron en syn soannen by it opbrekken fan it kamp klear binne mei it bedekken fan de hillige dingen en al it guod dat derby heart, dan earst meie de Kehatiten komme om it te dragen. Se meie lykwols net oan it hillige komme. Oars soenen se stjerre. Dat allegearre is it guod fan ’e tinte fan ’e moeting, dat de Kehatiten drage moatte. ₁₆Eleäzar, de soan fan pryster Aäron, giet oer de oalje foar de ferljochting, de wijreekkrûden, it deistich moaloffer en de salvingsoalje; oer de hiele tintwenning en alles dat deryn is, oer it hillichdom mei al it ark derby.

₁₇De Heare sei tsjin Mozes en Aäron: ₁₈Tink derom, dat by de Leviten de Kehatitetûke noait útstjert. ₁₉Doch dit dan foar harren, dat se it libben hâlde en net stjerre, as se tichteby it allerhillichste komme: Aäron en syn soannen moatte komme en wiis harren ien foar ien it plak oan by de tsjinst dy’t se hawwe te dwaan en de lêst dy’t se hawwe te dragen. ₂₀Mar lit de Kehatiten net hinnegean en kypje temûk efkes yn it hillige: it soe har dea wurde.

₂₁De Heare sei tsjin Mozes: ₂₂Nim ek it tal op fan ’e Gersjoniten mei har geslachten en famyljes. ₂₃Tusken de tritich en de fyftich jier moatsto se telle, allegearre dy’t foar de tsjinst yn ’e beneaming komme om wurk te dwaan yn ’e tinte fan ’e moeting. ₂₄Dit is it wurk fan ’e geslachten fan ’e Gersjoniten sawol by de tsjinst as by it dragen. ₂₅Hja moatte de tintkleden fan ’e wenning drage mei de tinte fan ’e moeting; syn tek en de kleden fan fyn lear dy’t der oerhinne lizze en it foarkleed fan ’e yngong fan ’e tinte fan ’e moeting. ₂₆De kleden fan it foarhôf, de ôfskieding oan ’e poarte-yngong fan it foarhôf dat om ’e wenning en it alter hinne leit, de koarden dêrfan en al it ark dat derby brûkt wurdt, ja alles dat dêroan te berêden is, dat is har wurk. ₂₇Al it wurk fan ’e Gersjoniten, it dragen likegoed as har oare tsjinstwurk, moat dien wurde, sa’t Aäron en syn soannen it har sizze; by alles wat se te dragen hawwe, moatte jimme krekt oanjaan, hoe’t it wurk ûnder harren ferparte wurde sil. ₂₈Dat is it wurk yn ’e tinte fan ’e moeting, dat foar de geslachten fan ’e Gersjoniten opkomt: de tsjinst dy’t se hawwe waar te nimmen stiet ûnder it tafersjoch fan Itamar, de soan fan pryster Aäron.

₂₉De Merariten moatsto telle mei har geslachten en famyljes. ₃₀Tusken de tritich jier en de fyftich jier moatsto se telle, allegearre dy’t tsjinst dogge foar it wurk yn ’e tinte fan ’e moeting. ₃₁Har wurk by it dragen en dat yn ’e tinte fan ’e moeting is: de soarch foar de planken fan ’e tintwenning, foar de bynten dy’t derby hearre, en foar de pylders en de fuotstikken dêrfan. ₃₂De pylders fan it foarhôf om ’e tinte hinne, mei de fuotstikken, de pinnen en de koarden, alle ark dat dêrby heart en alles wat dêrmei dien wurde moat, dat moatte jim allegearre mei namme en tanamme oantsjutte, dat elk krekt wit wat er te dwaan en te dragen hat. ₃₃Dat is it wurk fan ’e geslachten fan ’e Merariten, al har tsjinstwurk yn ’e tinte fan ’e moeting, dat se ûnder tafersjoch fan Itamar, de soan fan pryster Aäron, hawwe te dwaan.

₃₄Mozes, Aäron en de foaroansteanden fan ’e mienskip telden de Kehatiten mei har geslachten en famyljes, ₃₅tusken de tritich jier en de fyftich jier, allegearre dy’t tsjinst dienen en har wurk hienen yn ’e tinte fan ’e moeting. ₃₆Har famyljes telden mei-inoar 2750 man. ₃₇By de telling fan ’e geslachten fan ’e Kehatiten, dy’t Mozes en Aäron hâlden op it befel fan de Heare, dat Mozes oerbrocht hie, wienen dat de mannen dy’t tsjinst dienen yn ’e tinte fan ’e moeting.

₃₈Doe waarden de geslachten en famyljes fan ’e Gersjoniten teld, ₃₉tusken de tritich jier en de fyftich jier, allegearre dy’t tsjinst dienen by it wurk yn ’e tinte fan ’e moeting. ₄₀Har geslachten en famyljes wienen mei-inoar 2630 man yn tal. ₄₁By de telling fan ’e geslachten fan ’e Gersjoniten, dy’t Mozes en Aäron hâlden op befel fan de Heare, wienen dat de mannen dy’t tsjinst dienen yn ’e tinte fan ’e moeting.

₄₂Doe waarden de Merariten mei har geslachten en famyljes teld, ₄₃tusken de tritich en de fyftich jier, allegearre dy’t tsjinst dienen by it wurk yn ’e tinte fan ’e moeting. ₄₄Har geslachten wienen mei-inoar 3200 man yn tal. ₄₅By de telling fan ’e geslachten fan ’e Merariten, dy’t Mozes en Aäron hâlden op it befel fan de Heare, dat Mozes oerbrocht hie, wienen dat se. ₄₆Alle telden, dy’t Mozes mei Aäron en de foaroansteanden yn Israel telde, de geslachten en famyljes fan ’e Leviten, ₄₇tusken de tritich en de fyftich jier, allegearre dy’t tsjinst dienen by it wurk en it dragen by de tinte fan ’e moeting, ₄₈dy wienen mei-inoar 8580 man yn tal. ₄₉Op befel fan de Heare waarden se teld en wiisde Mozes har man foar man it tsjinstwurk en wat elk hie te dragen. Sa die er ek mei harren dy’t it tafersjoch deroer hienen, alles gong sa’t de Heare it Mozes opdroegen hie.