Numeri 3

₁Doe’t de Heare op ’e berch Sinai mei Aäron en Mozes spriek, wie dit har neigeslacht: ₂De nammen fan Aäron syn soannen wienen: Nadab, de earstlingssoan, dan Abihû, Eleäzar en Itamar. ₃Sa hieten de soannen fan Aäron, de salve prysters, dy’t hy oansteld hie om it prysteramt te betsjinjen. ₄Mar de Heare hie Nadab en Abihû stjerre litten, doe’t se yn ’e woestyn Sinai mei frjemd fjoer foar Him kamen. Mei’t se gjin soannen hienen, betsjinnen Eleäzar en Itamar tenei it prysteramt ûnder tafersjoch fan har heit Aäron.

₅De Heare sei tsjin Mozes: ₆Lit de stam Levy foarkomme en stel dy yn tsjinst fan Aäron, de pryster. ₇Ut namme fan him en fan de hiele mienskip moatte se by de tinte fan ’e moeting it wurk dwaan dat him oplein is, mei’t se de tsjinst by de tintwenning waarnimme. ₈Hja moatte soargje foar alle guod dat yn ’e tinte fan ’e moeting is, en sa út namme fan ’e Israeliten de tsjinst by de tintwenning waarnimme. ₉Do silst Aäron en syn soannen oer de Leviten beskikke litte; út alle Israeliten binne dat de lju dêr’t Aäron frij oer beskikke kin. ₁₀Mar Aäron sels en syn soannen moatsto oanstelle om it eigentlike prysteramt te betsjinjen; wa’t dat docht sûnder dat er it foech dêrta hat, dy moat stjerre.

₁₁De Heare sei tsjin Mozes: ₁₂Hjirmei sûnderje Iksels út it fermidden fan ’e Israeliten de Leviten ôf om yn it plak te stean fan alle earstlingssoannen, fan al wat yn Israel de memmeskurte ûntslút; dat no binne de Leviten mines. ₁₃Want My komme alle earstlingssoannen ta. De deis dat Ik yn Egypte alle earstlingssoannen deasloech, haw Ik alles wat yn Israel earstlingssoan is, by minske en bist, as hillich foar Mysels ferklearre. Mines binne se, Ik bin de Heare.

₁₄De Heare sei tsjin Mozes yn ’e woestyn Sinai: ₁₅Tel de Leviten yn har famyljes en geslachten, alle manlike persoanen fan ien moanne ôf moatsto telle. ₁₆Op befel fan de Heare telde Mozes har, krektsa’t him hjitten wie. ₁₇Dit binne de nammen fan ’e soannen fan Levy: Gersjon, Kehat en Merary.

₁₈Dit binne de nammen fan ’e geslachten fan ’e Gersjoniten: Libny en Sjimy. ₁₉De geslachten fan ’e Kehatiten binne: Amram, Jishar, Chebron en Oezziël. ₂₀De geslachten fan ’e Merariten binne: Machly en Mûsjy. Dat binne de stamhuzen fan ’e geslachten fan Levy. ₂₁By Gersjon hearre de geslachten fan ’e Libniten en de Sjimiten; dat wienen de geslachten fan ’e Gersjoniten. ₂₂Hja waarden teld neffens it tal manlike persoanen fan ien moanne ôf; mei-inoar wienen der 7500 man. ₂₃De famyljes fan ’e Gersjoniten leinen achter de tintwenning, op it westen. ₂₄Lieder fan it stamhûs fan ’e Gersjoniten wie Eljasaf, de soan fan Lael. ₂₅Wat de Gersjoniten by de tinte fan ’e moeting op ’e noed hienen, dat wienen de dekkleden, sawol dat fan ’e tinte as dat fan ’e tintwenning en it kleed by de yngong fan ’e tinte fan ’e moeting; ₂₆fierders de kleden om it foarhôf hinne, it kleed by de yngong fan it foarhôf dat om ’e tintwenning en it alter hinne lei en de koarden dy’t derby brûkt waarden.

₂₇By Kehat hearde it geslacht fan ’e Amramiten, fan ’e Jishariten, fan ’e Chebroniten en fan ’e Oezziëliten. ₂₈It tal manlike persoanen fan ien moanne ôf wie mei-inoar 8600 man. Dy moasten foar it hillichdom soargje. ₂₉De geslachten fan ’e Kehatiten leinen oan ’e súdlike lange side fan ’e tintwenning. ₃₀Lieder fan it stamhûs fan ’e geslachten fan ’e Kehatiten wie Elisafan, de soan fan Oezziël. ₃₁Hja hienen de soarch foar de arke, de tafel, de ljochter, de alters, it hillige ark dat derby brûkt waard, en it foarkleed mei alles wat derby hearde. ₃₂De heechste lieder fan de Leviten wie pryster Eleäzar, de soan fan Aäron. Hy stie oer de mannen dy’t de soarch foar it hillichdom hienen.

₃₃By Merary hearde it geslacht fan Machly en it geslacht fan Mûsjy; dat wienen de geslachten fan Merary. ₃₄Hja waarden teld neffens it tal manlike persoanen fan ien moanne ôf: mei-inoar wienen der 6200 man. ₃₅Lieder fan it stamhûs fan ’e geslachten fan Merary wie Sûriël, de soan fan Abichaïl; hja leinen oan ’e noardlike lange side fan ’e tintwenning. ₃₆De Merariten hienen it tafersjoch op de planken fan ’e tintwenning, de bynten, de pylders en de fuotstikken, fierders op al it ark en oer alles wat der mar by brûkt waard. ₃₇Boppedat op ’e pylders fan it foarhôf dêromhinne, mei de fuotstikken, pinnen en koarden. ₃₈Oan ’e eastkant fan ’e tintwenning, foar de tinte fan ’e moeting oer, oan ’e kant dêr’t de sinne opgiet, leinen Mozes en Aäron mei Aäron syn soannen. Dy hienen út namme fan ’e Israeliten de soarch foar de tsjinst yn it hillichdom. Wa’t dêr tichteby kaam, sûnder dat er it foech dêr ta hie, dy moast stjerre.

₃₉It hiele tal fan ’e Leviten, alle manlike persoanen fan ien moanne ôf, dy’t Mozes en Aäron op befel fan de Heare mei har geslachten teld hienen, wie mei-inoar 22.000 man.

₄₀De Heare sei tsjin Mozes: Tel alle manlike earstlingen by de Israeliten fan in moanne ôf, nim har tal krekt op. ₄₁Dan moatsto foar My – Ik bin de Heare – de Leviten nimme foar alle earstlingssoannen fan Israel yn it plak en it fee fan ’e Leviten foar al it earstberne fan it fee fan ’e Israeliten yn it plak. ₄₂Sa telde Mozes alle earstlingssoannen fan ’e Israeliten, krektsa’t de Heare him opdroegen hie. ₄₃De earstlingssoannen fan in moanne ôf dy’t teld waarden, wienen mei-inoar 22.273 man.

₄₄De Heare sei tsjin Mozes: ₄₅Nim de Leviten foar alle earstlingssoannen fan de Israeliten yn it plak en it fee fan ’e Leviten foar har fee yn it plak. De Leviten binne mines: Ik bin de Heare. ₄₆Foar de 273 earstlingssoannen by de Israeliten dy’t der mear binne as it tal Leviten ₄₇moatsto hieltyd fiif sikkel de man as lospriis nimme, yn sikkels fan it hillichdom; tweintich geara’s makket in sikkel. ₄₈Dat jild moatsto Aäron en syn soannen jaan as lospriis foar dy’t der by harren mear binne as it tal Leviten dêr’t oer beskikt wurde kin. ₄₉Mozes barde it losjild yn foar dyjingen dy’t der mear wienen as it tal fan harren dy’t troch de Leviten loskocht wienen. ₅₀Dat jild barde er fan ’e earstlingssoannen fan ’e Israeliten: 1365 sikkels, yn sikkels fan it hillichdom. ₅₁Op befel fan de Heare joech Mozes dat losjild oan Aäron en syn soannen, krektsa’t de Heare him opdroegen hie.