Numeri 34

₁De Heare sei tsjin Mozes: ₂Jou de Israeliten bestel en sis tsjin har: As jimme aanst yn Kanaän komme, dan sille de grinzen fan it lân de grinzen wêze fan wat jimme as besit tafalt. ₃De súdkant sil rinne fan ’e woestyn Sin ôf by Edom lâns; dy súdgrins begjint dus yn it easten by de fierste punt fan ’e Sâltsee, ₄rint dan mei in bocht súdlik om de Skorpioenepas hinne, rint troch nei Sin en komt dan út súdlik fan Kades-Barnéa, giet dan nei Chazar-Adar en rint troch nei Asmon. ₅Fan Asmon bûcht de grins om nei de beek fan Egypte en rint dan út op ’e see. ₆Wat jimme westergrins oanbelanget, dy foarmet de grutte See mei syn kuststripe; dat is dus de westergrins. ₇De noardergrins rint sa: fan ’e grutte See ôf moatte jimme in streek lûke nei de berch Hor; ₈fan ’e Hor ien nei de yngong fan Hamat; dy grins komt út by Sedad, ₉rint dan nei Sifron en komt út by Chazar-Enan; dat is jimme noardergrins. ₁₀Dan moatte jimme de eastergrins útsette fan Chazar-Enan nei Sjefam. ₁₁Fan Sjefam rint de grins del nei Ribla, eastlik fan Aïn, en rint dan deun deun by de eastlike wâl fan ’e mar Kinêret lâns, ₁₂giet dan del nei de Jordaan en komt by de Sâltsee út. Wat binnen dy grinzen leit, wolno, dat wurdt jimme lân.

₁₃Doe joech Mozes de Israeliten bestel: Dat is no it lân dat jimme troch it lot ferpartsje moatte en dat op befel fan de Heare oan de njoggen-en-in-heale stam jûn wurde moat. ₁₄Want de famyljes fan ’e stam fan ’e Rûbeniten en dy fan ’e Gaditen hawwe har part al krige; ek de helte fan ’e stam Manasse hat syn part al. ₁₅Dy twa-en-in-heale stam hawwe har part oan ’e oare kant de Jordaan by Jericho, de kant nei it easten op, dêr’t de sinne opgiet.

₁₆Doe sei de Heare tsjin Mozes: ₁₇Dit binne de nammen fan ’e mannen dy’t it lân ûnder jimme ferpartsje moatte: pryster Eleäzar en Jozua, de soan fan Nûn. ₁₈Boppedat moatte jimme út elke stam immen oanwize dy’t by it ferpartsjen fan it lân de lieding hat. ₁₉No komme de nammen fan dy mannen; foar de stam fan Juda: Kaleb, de soan fan Jefûnne; ₂₀foar de stam fan ’e Simeöniten: Sjemûel, de soan fan Ammihûd; ₂₁foar de stam fan Benjamin: Elidad, de soan fan Kislon; ₂₂foar de stam fan ’e Daniten: Bûkky, de soan fan Jogly; ₂₃foar de Joazefiten: as lieder foar de stam fan ’e Manassiten: Channïel, de soan fan Efod; ₂₄as lieder fan ’e stam fan ’e Efraïmiten: Kemûel, de soan fan Sjiftan; ₂₅as lieder fan ’e stam fan ’e Sebûloniten: Elisafan, de soan fan Parnak; ₂₆as lieder fan ’e stam fan ’e Issaskariten: Paltiël, de soan fan Azzan; ₂₇as lieder fan ’e stam fan ’e Azeriten: Achihûd, de soan fan Sjelomy; ₂₈as lieder fan ’e stam fan ’e Naftaliten: Pedaël, de soan fan Ammihûd. ₂₉Dat binne de mannen oan wa’t de Heare opdracht jûn hat om it lân Kanaän ûnder de Israeliten te ferpartsjen.