Numeri 28

₁De Heare sei tsjin Mozes: ₂Jou de Israeliten bestel en sis tsjin harren: Jimme moatte der tige om tinke en bring My op ’e stelde tiid myn offers, myn spize foar de fjoeroffers mei de rook dy’t Ik kostlik achtsje.

₃En sis tsjin harren: Dit is it fjoeroffer dat jim de Heare bringe sille: deis twa geve lammen fan in jier as in fêst brânoffer. ₄It iene laam moatsto moarns klearmeitsje, it oare yn ’e skimerjûn. ₅Dêr komt dan as moaloffer by in tsiende efa blom fan moal, oanmongen mei in fjirde fan in hyn útparse oalje. ₆Dat is it fêste brânoffer, sa’t it op ’e berch Sinai ynsteld is, in kostlike rook, in fjoeroffer foar de Heare. ₇By elk laam heart in drankoffer fan in fjirde hyn. Dat drankoffer fan drank moatsto yn it hillichdom foar de Heare útjitte. ₈It twadde laam moatsto yn ’e skimerjûn klearmeitsje mei krekt sa’n moaloffer as de moarns en mei it drankoffer dat dêrby heart: in fjoeroffer mei in kostlike rook foar de Heare.

₉Op ’e sabbatdei twa geve lammen fan in jier mei twa tsienden fan in efa blom fan moal as moaloffer, oanmongen mei oalje en mei it drankoffer dat dêrby heart. ₁₀Dat is it sabbatsbrânoffer dat elke sabbat brocht wurde moat, oer it fêste brânoffer mei it drankoffer dat dêrby heart, hinne.

₁₁By it begjin fan elke moanne moatte jimme as brânoffer foar de Heare bringe: twa interbollen, in raam en sân geve lammen fan noch gjin jier, ₁₂en trije tsienden fan in efa blom fan moal as moaloffer, oanmongen mei oalje foar elke bolle en twa tsienden blom fan moal as moaloffer, oanmongen mei oalje foar dy raam, ₁₃en ien tsiende blom fan moal as moaloffer mei oalje oanmongen by elk laam. Dat is in brânoffer mei in kostlike rook, in fjoeroffer foar de Heare. ₁₄As drankoffer moat dêrby in heale hyn op in interbolle en in tredde hyn op in raam en in fjirde fan in hyn op in laam. Dat is it brânoffer fan de nije moanne, dat alle nije moannen weroan, it hiele jier lâns, brocht wurdt. ₁₅Fierder moat der foar de Heare noch in geitebok klearmakke wurde as sûnde-offer. Dat moat allegearre offere wurde boppe it gewoane brânoffer mei it drankoffer dat dêrby heart.

₁₆Op ’e fjirtjinde dei fan ’e earste moanne is it Peaske foar de Heare; ₁₇en op ’e fyftjinde fan dy moanne is it feest: sân dagen lang moat der ûnsuorre brea iten wurde. ₁₈De earste deis sil der in hillige gearkomste wêze, dy deis mei der perfoarst net arbeide wurde. ₁₉Jimme moatte dan in fjoeroffer bringe, in brânoffer foar de Heare: twa jonge interbollen, ien raam, sân lammen fan noch gjin jier; allegear bisten sûnder skeel. ₂₀It moaloffer dêrby moat wêze: blom fan moal, mei oalje oanmongen: trije tsienden op in interbolle en twa tsienden op dy raam moatte jimme klearmeitsje; ₂₁Op elk fan ’e sân lammen moatsto iderkear in tsienden klearmeitsje; ₂₂fierder as sûnde-offer ien geitebok om fersoening foar jimme te dwaan. ₂₃Boppe it moarnsoffer – dat in gewoan brânoffer is – moatte jim dat allegear klearmeitsje. ₂₄Sa sille jim dei oan dei, sân dagen lang klearmeitsje wat nedich is foar it fjoeroffer, in kostlike rook foar de Heare. Boppe it gewoane brânoffer moat it klearmakke wurde, mei it drankoffer dat dêrby heart. ₂₅De sânde deis moatte jimme in hillige gearkomste hâlde; dan mei der perfoarst net arbeide wurde.

₂₆De deis fan ’e earstelingen, as jim de Heare in nij moaloffer bringe op jimme ‘Feest fan ’e wiken’, moatte jimme in hillige gearkomste hâlde; dan mei der perfoarst net arbeide wurde. ₂₇Jimme moatte dan as brânoffer bringe, in kostlike rook foar de Heare: twa jonge interbollen, ien raam en sân lammen fan in jier. ₂₈En as moaloffer derby: blom fan moal, mei oalje oanmongen: trije tsienden op in interbolle, twa tsienden op dy raam ₂₉en ien tsiende iderkear op elk fan ’e sân lammen; ₃₀mei in geitebok om fersoening foar jimme te dwaan. ₃₁Boppe it gewoane brânoffer en it spiisoffer dêrby en de drankoffers dy’t dêrby hearre, moatte jimme dat klearmeitsje; allegear bisten sûnder skeel.