Mattéus 28

₁Nei de sabbat, doe’t de earste dei fan ’e wike oanbriek, gongen Maria fan Magdala en de oare Maria derop út om by it grêf te sjen. ₂Ynienen begûn de grûn slim te skodzjen en in ingel kaam út ’e himel del by it grêf, rôle de stien foar de yngong wei en gong dêrop sitten. ₃Hy seach derút as de wjerljocht en syn klean wienen wyt as snie. ₄De wachters waarden sa kjel, dat se skodden deroer, en se waarden sa wyt as in deade. ₅Mar de ingel naam it wurd en sei tsjin ’e froulju: Jimme moatte net bang wêze. Ik wit, dat jimme om Jezus sykje, dy’t krusige is. ₆Dy is hjir net, want Hy is ferriisd, lykas Er sein hat. Kom, sjoch it plak mar ris, dêr’t Er lein hat. ₇Gean mar gau werom en sis tsjin de learlingen: Hy is ferriisd en giet jimme foarút nei Galiléa. Dêr sille jimme Him sjen. Dat hie ik jim te sizzen.

₈De froulju wienen hastich by it grêf wei, bang en dochs ek tige bliid en se draafden om it syn learlingen mar gau te fertellen. ₉En doe samar ynienen kaam Jezus harren temjitte en sei: Moarn! Hja kamen tichterby, foelen op ’e knibbels en omklammen earbiedich syn fuotten. ₁₀Doe sei Jezus tsjin harren: Wês mar net bang. Bring myn bruorren mar gau it boadskip oer, dat se nei Galiléa gean moatte. Dêr sille se My sjen.

₁₁Doe’t de froulju noch ûnderweis wienen, kamen der guon fan ’e wacht yn ’e stêd en fertelden de hegeprysters alles wat him foardien hie. ₁₂Dy kamen gau byinoar mei de âldsten en nei oerlis beaën se de soldaten in grou stik jild. ₁₃Se seinen derby: No moatte jim sizze, dat syn learlingen fannacht kommen binne en dat dy Him temûk meinommen hawwe, doe’t jim sliepten. ₁₄En as de lânfâd hjir wat fan te witten komme soe, sille wy him wol delbêdzje. Wy soargje wol, dat jimme gjin lêst krije. ₁₅Doe namen se it jild oan en dienen, sa’t it harren foarpraat wie. Dat ferhaal giet ûnder de Joaden oan hjoed-de-dei ta.

₁₆De alve learlingen gongen nei Galiléa, nei de berch dêr’t Jezus har oansein hie te kommen. ₁₇Doe’t se Him seagen, foelen se earbiedich foar Him del, mar der wienen ek guon, dy hâlden har op in distânsje. ₁₈Jezus kaam tichterby en sei tsjin harren: My is alle macht jûn yn ’e himel en op ’e ierde. ₁₉Gean der dus op út en meitsje alle folken learlingen fan My, doop harren yn ’e namme fan de Heit en fan de Soan en fan de hillige Geast, ₂₀en lear harren alles nei te kommen, wat Ik jimme oplein haw. Sjoch, Ik bin alle dagen by jimme oan ’e ein fan ’e tiden ta.