Leviticus 2

₁As immen de Heare as offerjefte in moaloffer bringt, dan moat syn offerjefte fan fyn moal wêze en hy moat dêr oalje oer jitte en wijreek der by dwaan. ₂Dan moat er dat bringe by de soannen fan Aäron, de prysters, en hy moat dêr in hanfol fan nimme, fan it fine moal en fan ’e oalje, met alle wijreek en dan sil de pryster dat part as in oantinkensoffer op it alter yn reek opgean litte as in fjoeroffer, in swietrook foar de Heare. ₃Wat der fan it moaloffer oerbleaun is, dat sil foar Aäron en syn soannen wêze. It is fan ’e fjoeroffers fan de Heare, it heechhillige.

₄En ast as offerjefte in moaloffer bringst dat yn ’e oven bakt is, dan moatte dat ûnsuorre koeken wêze fan fyn moal, oanmongen mei oalje, of ûnsuorre platte koeken, dy’t mei oalje bestrutsen binne.

₅As dyn offerjefte in moaloffer is fan in bakplaat, dan moat dat ûnsuorre wêze, fan fyn moal, oanmongen mei oalje. ₆Brek dat dan yn stikken en jit dêr oalje oer. It is in moaloffer.

₇En as dyn offerjefte in moaloffer út ’e panne is, dan moatst it mei oalje klearmeitsje. ₈It moaloffer dat op ien fan dy wizen klearmakke is, moatst nei de Heare tabringe. It wurdt dan de pryster oanrikt en dy draacht it nei it alter ta. ₉De pryster sil út it moaloffer it oantinkensoffer helje en dat op it alter yn reek opgean litte as in swietrokich fjoeroffer foar de Heare. ₁₀Wat der fan it moaloffer oerbleaun is, dat sil foar Aäron en syn soannen wêze. It is fan ’e fjoeroffers fan de Heare, it heechhillige.

₁₁Gjin inkeld moaloffer dat jimme de Heare bringe, meie jim klearmeitsje fan wat riisd is. Neat fan soerdaai of fan hunich sille jimme as in fjoeroffer foar de Heare yn reek opgean litte. ₁₂As offerjefte fan ’e earstelingen meie jim dat oan de Heare bringe, mar op it alter meie se net opstige as in swietrook foar de Heare. ₁₃Alle offerjeften fan dyn moaloffer moatst sâlt yn dwaan. Do meist it sâlt fan it ferbûn fan dyn God der net út weilitte. Al dyn offerjeften moat dus sâlt by.

₁₄En asto de Heare in moaloffer fan ’e earste fruchten bringst, dan moatte dat ieren wêze, dy’t yn it fjoer roastere binne. As fynstampte farske nôtkerlen, sa moatst it moaloffer fan dyn earste fruchten bringe. ₁₅Dan moatst der oalje by dwaan en dêr wijreek oerhinne lizze. It is in moaloffer. ₁₆En de pryster sil it oantinkensoffer fan ’e fynstampte nôtkerlen mei alle wijreek yn reek opgean litte as in fjoeroffer foar de Heare.