It bliid boadskip fan it heil
1De Geast fan God de Heare is oer my kommen,
want Hy hat my salve
en my útstjoerd om fersleinen bliid boadskip te bringen,
om brutsene herten te ferbinen,
om ûnfrijen de frijheid oan te sizzen
en dy’t fêst sitte ferlossing út har bannen,
2om fan de Heare út te roppen in genedejier,
de dei dat ús God wraak nimt;
om alle treurjenden te treasten,
3om de treurjenden fan Sion
ynpleats fan jiske in feestkrânse te jaan,
feestlik rûkersguod ynpleats fan routriennen,
in fleurige útris ynpleats fan mismoedigens.
Skoandere ikebeammen sille se neamd wurde,
troch de Heare plante om Him te ferhearlikjen.
4Ieuwenâlde púnfallen bouwe se wer op;
wat wit-hoe-lang ferrinnewearre lei,
sette se wer oerein,
de fernielde stêden meitsje se wer as nij,
al wat sûnt minskeheugenis ferrinnewearre lei.
5Frjemden sille foar it weidzjen fan jimme keppels stean,
útlâns folk sil jim lân bebouwe en jim wyngerds berêde.
6Mar jimme sels sille prysters fan de Heare hjitte,
en tsjinners fan ús God neamd wurde;
de rykdom fan ’e heidenfolken sille jim oan te gast gean,
en jim sille glânzich wurde fan har oerfloed.
7Om’t myn folk dûbeld skande oandien is
en se bespot en bespein binne,
dêrom krije se no alles dûbeld werom yn har eigen lân
en sil ivige freugde har diel wurde.
8Want Ik, de Heare, haw it rjocht leaf,
en Ik haatsje roverij en minne streken.
Ik sil harren earlik har lean jaan
en in ivich ferbûn mei harren slute.
9Har neikommelingen sille ferneamd wêze ûnder de folken,
ja, har neiteam sil namme hawwe by de naasjes;
allegearre dy’t harren sjogge, sille dan tajaan,
dat sij it skaai binne, dat de Heare segene hat.
10Ik bin troch alles hinne bliid yn de Heare,
en mei hert en siel jubelje ik om myn God;
want Hy hat my klaaid yn heil
en my de mantel fan gerjochtichheid oandien,
sa’t in breugeman in pryster-tulbân opset
en in breid har opsiert mei har juwielen.
11Want sa’t de ierde it gewaaks útsprute lit
en in tún it sied opkomme lit,
sa sil God de Heare gerjochtichheid en lof
útsprute litte foar it each fan alle folken.
