Jesaja 12

₁Dy deis silsto sizze:

Ik tankje Jo, Heare, want al wienen Jo lilk op my,

jo grime is belune en Jo ha my treaste.

₂Ja, God hat my rêden,

ik haw betrouwen en sit net yn noed,

want de Heare is myn krêft en myn sterkte.

Hy is it, dy’t my rêden hat.

₃Mei blydskip kinne jim wetter skeppe út ’e wellen fan it heil.

₄Dyselde deis sille jim sizze:

Tankje de Heare, rop syn namme oan!

Meitsje ûnder de folken syn dieden bekend,

ferkundigje hoe heech syn namme is.

₅Lit psalmen klinke foar de Heare,

want grutte dingen hat Er dien,

dêr moat de hiele ierde fan witte.

₆Rop it út en jubelje, folk dat op ’e Sion wennet,

want yn jim fermidden is yn al syn gruttens de Hillige fan Israel.