Genesis 46

₁Doe briek Israel op mei alles dat er hie, en hy kaam te Beër-Sjêba en brocht fleisoffers oan de God fan syn heit Izaäk. ₂Dy nachts sei God yn in fizioen tsjin Israel: Jakob, Jakob! En hy sei: Ja, hjir bin ik. ₃Hy sei: Ik bin God, de God fan dyn heit. Wês mar net bang om nei Egypte te gean, want Ik sil dy dêr ta in grut folk útgroeie litte. ₄Iksels gean mei dy del nei Egypte en Iksels sil dy ek wis werom komme litte en Joazef sil dy de eagen tichtdrukke.

₅Doe makke Jakob him klear om út Beër-Sjêba wei te gean en de soannen fan Israel setten har heit Jakob, har bern en har froulju op ’e weinen dy’t Farao stjoerd hie om him yn op te heljen. ₆Hja namen har fee en har besit dat se yn it lân Kanaän krige hienen, mei, en sa kaam Jakob mei syn hiele neigeslacht yn Egypte. ₇Syn soannen en dy har soannen, syn dochters en dy fan syn soannen, ja syn hiele neigeslacht naam er mei nei Egypte.

₈Dit binne de nammen fan Israels soannen, dy’t yn Egypte kamen, Jakob en syn soannen: Jakobs âldste: Rûben, ₉en de soannen fan Rûben: Chanok, Pallû, Chesron en Karmy. ₁₀De soannen fan Simeön: Jemûel, Jamyn, Ohad, Jakin, Sohar en Sjaûl, de soan fan in Kanaänityske. ₁₁De soannen fan Levy: Gersjom, Kehat en Merary. ₁₂De soannen fan Juda: Er, Onan, Sjela, Pêres en Sêrach. Er en Onan wienen al yn it lân Kanaän stoarn. De soannen fan Pêres wienen: Chesron en Chamûl. ₁₃De soannen fan Issaskar: Tola, Pûwwa, Job en Sjimron. ₁₄De soannen fan Sebûlon: Sêred, Elon en Jachleël. ₁₅Dat wienen de soannen fan Léa, dy’t se fan Jakob krige hat yn Paddan-Aram en ek noch Dina, syn dochter. Allegearre mei-inoar wienen syn soannen en dochters trijeëntritich. ₁₆De soannen fan Gad: Sifjon, Chaggy, Sjûny, Esbon, Ery, Arody en Arely. ₁₇De soannen fan Azer: Jimna, Jisjwa, Jisjwy, Beria en har suster Sêrach. De soannen fan Beria: Chêber en Malkiël. ₁₈Dat wienen de soannen fan Silpa, dy’t Laban oan syn dochter Léa mei jûn hie. Hja krige dy fan Jakob: sechtsjin persoanen. ₁₉De soannen fan Jakob syn frou Rachel, wienen Joazef en Benjamin. ₂₀Joazef krige yn Egypte Manasse en Efraïm, dy’t Asnat, de dochter fan Potifeara, de pryster fan On, him joech. ₂₁De soannen fan Benjamin: Bêla, Bêker, Asjbel, Geara, Naäman, Echy en Roosj, Mûppim, Chûppim en Ard. ₂₂Dat wienen de soannen fan Rachel, dy’t hja fan Jakob krige, allegearre mei-inoar fjirtjin persoanen. ₂₃De soan fan Dan: Chûsjim. ₂₄De soannen fan Naftaly: Jachseël, Gûny, Jeser en Sjillem. ₂₅Dat wienen de soannen fan Bilha, dy’t Laban oan syn dochter Rachel meijûn hie en dy hat hja fan Jakob krige: allegearre mei-inoar sân persoanen. ₂₆Allegearre dy’t by Jakob hearden sa’t se yn Egypte kamen en fan syn fleis en bloed wienen, wienen mei-inoar – de froulju fan Jakob syn soannen net meirekkene – seis-en-sechstich man. ₂₇De soannen fan Joazef dy’t er yn Egypte krige hie, wienen twa man. Dat dy’t fan Jakobs hûs yn Egypte kamen, wienen mei-inoar santich man.

₂₈Jakob stjoerde Juda foarút nei Joazef ta om him de wei nei Gosjen te wizen. En sa kamen se yn it lân Gosjen oan. ₂₉Doe sloech Joazef syn reau yn en reizge nei Gosjen, syn heit Israel yn ’e mjitte. Doe’t er by him kaam, sloech er him de hannen om ’e hals en skriemde sa gâns in skoft. ₃₀En Israel sei tsjin Joazef: Lit my no mar stjerre, nei’t ik dyn gesicht wer sjoen haw. Do libbest ommers noch! ₃₁Dêrop sei Joazef tsjin syn bruorren en tsjin syn heite húsgesin: Ik gean no hinne en fertel it Farao. En ik sil tsjin him sizze: Myn bruorren en myn heite húsgesin út Kanaän binne by my kommen. ₃₂De mannen binne skieppehoeders, ja it binne feehâlders. Har lytsfee, har kij en al har hawwen en hâlden hawwe se meinommen. ₃₃Dat as Farao jim ropt en seit: Wat hawwe jim by de ein? ₃₄dan moatte jim sizze: Jo tsjinstfeinten ha fan jongs ôf oan oant no ta feehâlders west, krektsa as ek ús foarâlden. Dan komme jimme yn it lân Gosjen te wenjen. Want al wat skieppehoeder is, dêr ha de Egyptners in ôfgriis fan.