Genesis 40

₁It wie nei dy foarfallen, dat de skinker fan ’e kening fan Egypte en de bakker har misdroegen tsjin har hear, de kening fan Egypte. ₂Dat Farao waard lilk op syn beide hovelingen, op ’e opperskinker en op ’e opperbakker, ₃dat hy sette se yn bewar by it hûs fan ’e kommandant fan ’e liifwacht, yn itselde tichthús dêr’t Joazef opsletten wie. ₄En de kommandant fan ’e liifwacht droech Joazef op har te betsjinjen.

Doe’t se in skoft sitten hienen, ₅krigen se beide in dream, elk syn eigen dream yn ien-en-deselde nacht, mei in eigen betsjutting, de skinker likegoed as de bakker fan ’e kening fan Egypte, dy’t opsletten sieten yn it tichthús.

₆Doe’t Joazef de moarns by har kaam en har oanseach, fernaam er dat hja alhiel fan ’e wize wienen. ₇Dat hy frege de hovelingen fan Farao dy’t mei him fêst sieten yn it hûs fan syn hear: Wêrom sjogge jimme hjoed sa tryst? ₈Hja seinen tsjin him: Wy hawwe in dream hân en der is gjinien dy’t dy útlizze kin. Joazef sei tsjin har: De útlizzingen komme ommers fan God? Fertel se my ris. ₉De opperskinker fertelde doe Joazef syn dream. Hy sei tsjin him: Yn myn dream stie der ynienen in wynstôk foar my ₁₀en oan dy wynstôk sieten trije ranken. En mei’t er útrûn, skeat er ek yn ’e bloei en droegen syn trossen ripe druven. ₁₁Ik hie de beker fan Farao yn ’e hân. En ik naam de ripe druven en parse dy út yn Farao syn beker. Doe joech ik Farao de beker op ’e hân. ₁₂Joazef sei tsjin him: Dit is de betsjutting: De trije ranken, dat binne trije dagen. ₁₃No noch trije dagen, dan sil Farao jo holle ferheegje en jo wer yn jo amt oanstelle en jo sille Farao de beker wer yn ’e hân jaan, lykas jo foartiid wend wienen, doe’t jo syn skinker wienen. ₁₄Soenen jo dan, as it jo wer goed giet, nochris oan my tinke wolle? En wês dan sa goed, myn saak ûnder de oandacht fan Farao te bringen en lit my út dit hûs helje. ₁₅Want wier, ik bin stellen út it lân fan ’e Hebreeërs en ek hjir haw ik hielendal neat dien, dat se my yn dizze hoale sette moasten.

₁₆Doe’t de opperbakker fernaam dat it mei de útlis fan ’e earste dream mar skoan like, sei er tsjin Joazef: Ik hie ek in dream en sjoch, trije kuorren mei fyn gebak hie ik op ’e holle. ₁₇Yn ’e boppeste koer wie fan allerhanne iten foar Farao, bakkersguod, mar de fûgels ieten dat op út ’e koer boppe myn holle wei. ₁₈En Joazef antwurde: Dit is de betsjutting: De trije kuorren, dat binne trije dagen. ₁₉Noch trije dagen, dan sil Farao jo holle ferheegje, ja, fan jo ôfnimme en hy sil jo oan in beam hingje en de fûgels sille it fleis fan jo ôffrette.

₂₀Op ’e tredde dei, Farao syn jierdei, joech dy in feestmiel foar al syn tsjinners en hy ferhege de holle fan ’e opperskinker en de holle fan ’e opperbakker yn it fermidden fan syn tsjinners. ₂₁Hy sette de opperskinker wer yn syn skinkersamt, dat dy joech Farao de beker wer op ’e hân. ₂₂Mar de opperbakker hong er op, sa’t Joazef it har útlein hie. ₂₃De opperskinker lykwols tocht net mear oan Joazef. Hy fergeat him.