Genesis 34

₁Dina, de dochter dy’t Léa Jakob jûn hie, gong der ris op út om de fammen fan it lân op te sykjen. ₂Doe’t Sichem, de soan fan ’e Chiwwyt Hemor, de foarst fan it lân har seach, naam er har mei, sliepte by har en kaam har te nei. ₃En hy hechte him tige oan Dina, de dochter fan Jakob. Hy hâlde fan it fanke en koe it wakker mei har roaie. ₄Sichem sei tsjin syn heit Hemor: Nim dizze faam foar my ta frou. ₅Doe’t Jakob hearde, dat er syn dochter Dina skeind hie, wienen syn soannen yn it fjild by it fee. Dat Jakob hâlde him stil oant se thúskamen.

₆Hemor, Sichem syn heit, kaam by Jakob om mei him te praten. ₇De soannen fan Jakob lykwols hienen it net heard of hja kamen út it fjild wei. De mannen namen it har tige nei en wienen slim rekke, omdat Sichem Israel skande oandien hie troch by Jakob syn dochter te sliepen, in ding dat gjin pas joech. ₈Mar Hemor prate mei har en sei: Myn soan Sichem – dy is alhiel sljocht om dat fanke fan jimme. Jou har him dochs ta frou. ₉Lit ús famyljebannen mei inoar oangean. Jou ús jimme dochters en nim jimme ús dochters. ₁₀Wenje by ús en it lân is ta jimme foldwaan. Bliuw en krús der yn om en krij der besittings yn. ₁₁En Sichem sei tsjin har heit en bruorren: As jimme my dy geunst dogge, dan sil ik jimme jaan wêr’t jim mar om freegje. ₁₂Lis my mar in tige grutte breidskat op en in grut breidsgeskink. Ik sil it jaan sa’t jim it my sizze, mar jou my it fanke ta frou.

₁₃Doe joegen Jakobs soannen Sichem en syn heit Hemor antwurd, mar hja sprieken falsk, omdat er har suster Dina skeind hie. ₁₄En hja seinen tsjin har: Dat kinne wy net dwaan: ús suster jaan oan in man dy’t de foarhûd noch hat, want dat soe in skande foar ús wêze. ₁₅Allinne op dit betingst wolle wy jim te wille wêze, dat jim wurde lykas wy, trochdat alle manspersoanen by jim har besnije litte. ₁₆Earst dan sille wy ús dochters oan jimme jaan en jim dochters foar ús nimme. Wy sille dan by jim wenje en ien folk wurde. ₁₇Mar as jim net nei ús harkje en jim litte jim net besnije, dan nimme wy ús dochters wer mei en geane fuort. ₁₈Har wurden liken Hemor en Sichem, Hemor syn soan, wol goed ta. ₁₉De jongeman liet der gjin gers oer groeie en regelje dy kwestje, want hy hâlde fan ’e dochter fan Jakob en hy hie de grutste ynfloed yn syn heite famylje.

₂₀Doe’t Hemor en syn soan Sichem oankommen wienen by de poarte fan har stêd, sprieken se de manlju fan ’e stêd ta en seinen: ₂₁Dizze mannen kinne goed mei ús oer de wei. Lit har yn it lân wenje en dêr yn omkruse. It lân hat ommers romte genôch foar harren. Wy kinne dan har dochters foar ús ta frou nimme en ús dochters oan har jaan. ₂₂Allinne op dit betingst wolle dy mannen ús te wille wêze en by ús wenjen bliuwe om ien folk te wurden, dat alle manspersoanen by ús har besnije litte, lykas hja besnien binne. ₂₃Har keppels, har besit en har bisten allegearre sille dan uzes ommers wêze. Lit ús har allinne mar te wille wêze en dan sille se by ús te wenjen bliuwe. ₂₄Allegearre dy’t nei de stedspoarte gien wienen, harken nei Hemor en syn soan Sichem, dat alle manspersoanen, allegearre dy’t nei de stedspoarte gien wienen, lieten har besnije.

₂₅De tredde deis, doe’t se pine krigen, namen de beide soannen fan Jakob, Simeön en Levy, folle broers fan Dina, elk syn swurd en kamen sûnder muoite yn ’e stêd en deaden alle manspersoanen. ₂₆Ek Hemor en syn soan Sichem deaden se mei it skerp fan it swurd. Doe hellen se Dina út Sichem syn hûs en gongen mei har de stêd út. ₂₇De soannen fan Jakob gongen oer de fersleinen gear en plonderen de stêd, omdat se har suster skeind hienen. ₂₈Har lytsfee, har kij, har ezels en alles wat yn ’e stêd en op it fjild wie, namen se mei, ₂₉ek al har guod, en har bern en froulju namen se gefangen en plonderen alles dat yn ’e huzen wie.

₃₀Doe sei Jakob tsjin Simeön en Levy: Jim hawwe my ûngelokkich makke en my by de bewenners fan dit lân, de Kanaäniten en de Perizziten op in minne namme brocht. En ik ha mar in stikmannich minsken. As hja mei-inoar tsjin my komme, sille se my ferslaan en ik sil mei myn hûs ferneatige wurde. ₃₁Mar hja seinen: Mocht er dan mei ús suster dwaan as mei in hoer?