Exodus 40

₁De Heare sei tsjin Mozes: ₂De earste deis fan ’e earste moanne moatst de wenning, de tinte fan ’e moeting, opsette. ₃Dêr moatst de arke mei de Ferbûnsakte delsette en dan moatst dy arke mei it foarkleed ôfskermje. ₄Dan moatst de tafel dêryn bringe en wat dêr op heart, te plak skikke. Bring dan de ljochter binnen en set de lampen dy’t dêr by hearre, dêrop. ₅Set dan it gouden alter foar it rookwurk te plak foar de arke mei de Ferbûnsakte en hingje it gerdyn foar de yngong fan ’e wenning. ₆Dan moatst it brânofferalter te plak sette foar de yngong fan ’e wenning, de tinte fan ’e moeting. ₇Set dan it waskfet te plak tusken de tinte fan ’e moeting en it alter, en doch dêr wetter yn. ₈Dan moatst dêromhinne it foarhôf opsette en foar de poarte fan it foarhôf it gerdyn ophingje.

₉Nim dan de salvingsoalje en salvje de wenning en alles dat dêryn is. Ast dy mei alle gerei dat dêrby heart wijd hast, dan sil it hillich wêze. ₁₀Do moatst ek it brânofferalter mei alle gerei salvje en it alter wije; dan sil it alter heechhillich wêze. ₁₁Salvje it waskfet mei syn fuotstik en wij dat.

₁₂Dan moatst Aäron en syn soannen nei de yngong fan ’e tinte bringe en har mei wetter waskje. ₁₃Doch dan Aäron de hillige klean oan, salvje him en wij him, dat er My as pryster tsjinje kin. ₁₄Ek syn soannen moatst neier komme litte en har de ûnderklean oandwaan. ₁₅Salvje har dan krekt sasto har heit salve hast, dat se My as pryster tsjinje. Dit moat dien wurde, dat de salving harren foar altyd de prysterlike weardichheid jaan sil, al har geslachten troch.

₁₆En Mozes die alles sa’t de Heare it him hjitten hie. Krektsa hat er it dien. ₁₇It wie op ’e earste dei fan ’e earste moanne fan it twadde jier, dat de wenning opset waard. ₁₈Mozes sette de wenning op. Hy lei de fuotstikken te plak en sette dêr de planken op. Doe brocht er de dwersklampen te plak en sette de pylders oerein. ₁₉Dêrop spande er de tinte oer de wenning en lei it tek boppe op de tinte, sa’t de Heare him hjitten hie.

₂₀Doe naam er de Ferbûnsakte en lei dy yn ’e arke. De draachstokken die er oan ’e arke en it soendeksel lei er boppe op de arke. ₂₁Dêrop brocht er de arke yn ’e wenning en hong it ôfskermjende foarkleed op. Sa skerme Mozes de arke mei de Ferbûnsakte ôf, sa’t de Heare him hjitten hie.

₂₂Ek sette er de tafel te plak yn ’e tinte fan ’e moeting, oan ’e noardkant fan ’e wenning, bûten it foarkleed. ₂₃Hy skikte dêrop it brea te plak foar de Heare, sa’t de Heare Mozes hjitten hie. ₂₄De ljochter sette er yn ’e tinte fan ’e moeting, lyk foar de tafel oer, oan ’e súdkant fan ’e wenning. ₂₅Hy stiek de lampen op foar de Heare, sa’t de Heare Mozes hjitten hie.

₂₆Fierders sette er it gouden alter yn ’e tinte fan ’e moeting foar it foarkleed, ₂₇en hy liet dêrop rookwurk fan swietrokige krûden yn reek opgean, sa’t de Heare him hjitten hie.

₂₈Hy hong it gerdyn op foar de yngong fan ’e wenning, ₂₉en it brânofferalter sette er oan ’e yngong fan ’e wenning, de tinte fan ’e moeting, en hy brocht dêrop it brânoffer en it moaloffer, sa’t de Heare him hjitten hie.

₃₀It waskfet sette er tusken de tinte fan ’e moeting en it alter, en hy die dêr waskwetter yn. ₃₁Mozes, Aäron en dy syn soannen wosken har dêr de hannen en de fuotten yn. ₃₂As se de tinte fan ’e moeting yngongen en as se by it alter kamen, wosken se har, sa’t de Heare Mozes hjitten hie.

₃₃Doe sette er it foarhôf op om ’e wenning en it alter hinne en hy hong it gerdyn foar de poarte fan it foarhôf. En sa makke Mozes dien wurk.

₃₄En in wolk bediek de tinte fan ’e moeting en de hearlikheid fan de Heare naam de hiele wenning yn beslach, ₃₅dat Mozes koe net yn ’e tinte fan ’e moeting komme, want de wolk hie him dêroer hinne lein en de hearlikheid fan de Heare hie de wenning hielendal yn beslach nommen.

₃₆En as de wolk omheech gong, boppe de wenning wei, dan gongen de Israeliten wer fierder op al har reizen. ₃₇Mar as de wolk net omheech gong, dan brieken de Israeliten net op, oant de deis dat er wer omheech gong. ₃₈Want op al har reizen stie de wolk fan de Heare boppe de wenning en nachts wie dêr in fjoer yn, dat foar it hiele folk fan Israel te sjen wie.