Exodus 38

₁Hy makke it brânofferalter fan akaziahout. It wie fiif jellen lang en fiif jellen breed, fjouwerkant dus, en trije jellen wie it heech. ₂Ek makke er de hoarnen dêrfan út ien stik dêrmei. De hoarnen sieten op ’e fjouwer hoeken. Hy besloech se mei brûns. ₃En alle gerei foar it alter hat er makke: de potten, de skeppen, de skalen, de foarken en de fjoerpannen. Alle gerei dêrfoar makke er fan brûns. ₄Hy makke in roaster foar it alter, in brûnzen roaster, ûnderoan, oant healwei de râne. ₅Fjouwer ringen geat er oan ’e fjouwer einen fan it brûnzen roaster, as hâlders foar de draachstokken. ₆Dy draachstokken makke er fan akaziahout en besloech dy mei brûns. ₇Hy brocht de draachstokken oan yn ’e ringen oan ’e sydkanten fan it alter, om it dêrmei te dragen. Hol en fan brede planken hat er it alter makke.

₈Hy makke it waskfet fan brûns en it fuotstik fan brûns fan ’e spegels fan ’e froulju dy’t tsjinst dienen by de yngong fan ’e tinte fan ’e moeting.

₉Ek makke er in foarhôf: oan ’e side op it suden kleden fan fyn twynd linnen foar it foarhôf fan hûndert jellen. ₁₀De tweintich pylders en de tweintich fuotstikken dy’t dêrby hearden, wienen fan brûns, de heakken mei de ringen oan ’e pylders fan sulver. ₁₁Oan ’e noardkant hûndert jellen mei tweintich pylders en tweintich brûnzen fuotstikken, de heakken mei de ringen oan ’e pylders fan sulver. ₁₂Oan ’e westkant fyftich jellen kleed mei tsien pylders en tsien fuotstikken; de heakken mei de ringen oan ’e pylders fan sulver; ₁₃ek oan ’e eastkant fyftich jellen; ₁₄fyftjin jellen kleed oan ’e iene kant mei trije pylders en trije fuotstikken en ₁₅ek oan ’e oare kant – dus oan wjerskanten fan ’e poarte fan it foarhôf – fyftjin jellen kleed mei trije pylders en trije fuotstikken. ₁₆Alle kleden om it foarhôf hinne wienen fan fyn twynd linnen. ₁₇De fuotstikken foar de pylders wienen fan brûns, de heakken en ringen oan ’e pylders fan sulver en ek it beslach oer it boppe-ein wie fan sulver. Ek wienen alle pylders fan it foarhôf mei sulver oaninoar ferbûn.

₁₈It gerdyn foar de poarte fan it foarhôf wie fan borduerwurk, fan pearse, poarperreade en karmozynkleurige wol en fan fyn twynd linnen. It wie tweintich jellen lang en de hichte – yn ’e breedte – fiif jellen, krektlyk as de kleden fan it foarhôf. ₁₉De fjouwer pylders dêrby mei de fjouwer fuotstikken fan brûns, de heakken fan sulver en it beslach oer it boppe-ein en de ferbinings fan sulver. ₂₀Alle pinnen foar de wenning en dy om it foarhôf hinne, wienen fan brûns.

₂₁Dit binne de ôfrekkens fan ’e wenning, de wenning mei de Ferbûnsakte, dy’t ferantwurde binne op befel fan Mozes. Dat wie de taak fan ’e Leviten ûnder lieding fan Itamar, de soan fan Aäron, de pryster. ₂₂Besaleël, de soan fan Oery, de soan fan Chûr, út ’e stam Juda hat alles makke dat de Heare Mozes opdroegen hie. ₂₃En mei him wie Aholiab, de soan fan Achisamak fan ’e stam Dan, in hantwurker, mar ek ûntwerper en borduerder yn himelsblauwe, poarperreade en karmozynkleurige wol en fyn linnen. ₂₄It goud dat yn it hiele wurk oan it hillichdom ferwurke wie – dat wie it goud fan it beweechoffer – wie mei-inoar 29 talinten en 730 sikkel, berekkene neffens de hillige sikkel. ₂₅It sulver fan harren dy’t ynskreaun wienen yn ’e gemeente, kaam op 100 talinten en 1775 sikkel, berekkene neffens de hillige sikkel. ₂₆In beka de man, dat is de helte fan in sikkel neffens de hillige sikkel, foar allegearre dy’t oergongen nei de ynskreaunen fan tweintich jier âld en dêrboppe: 603.550 man. ₂₇De hûndert talinten sulver wienen foar it jitten fan ’e fuotstikken fan it hillichdom en foar dy fan it foarkleed. Hûndert fuotstikken út hûndert talinten. In talint it fuotstik.

₂₈En fan de 1775 sikkel makke er de ringen foar de pylders en besloech er de boppe-einen dêrfan en hat er se oaninoar ferbûn. ₂₉It brûns fan it beweechoffer kaam op santich talinten en fjouwerentweintichhûndert sikkel. ₃₀Dêr makke er de fuotstikken fan foar de yngong fan ’e tinte fan ’e moeting, it brûnzen alter en it brûnzen roaster dat dêr by hearde en ek alle gerei fan it alter. ₃₁Fierders de fuotstikken om it foarhôf hinne en ek de fuotstikken foar de poarte fan it foarhôf, en alle pinnen foar de wenning en alle pinnen om it foarhôf hinne.