Exodus 37

₁Besaleël makke de arke fan akaziahout. De langte dêrfan wie treddel jellen, de breedte oardel jellen en de hichte oardel jellen. ₂Hy besloech dy fan binnen en fan bûten mei suver goud. Ek makke er dêr in gouden list omhinne. ₃Hy geat dêr fjouwer gouden ringen foar oan de fjouwer poaten. Twa ringen oan ’e iene en twa oan ’e oare side. ₄Dan makke er draachstokken fan akaziahout en besloech dy mei goud. ₅Hy stiek dy draachstokken troch de ringen oan ’e sydkanten fan ’e arke, om dy arke te dragen.

₆Hy makke in soendeksel fan suver goud, treddel jellen lang en oardel jellen breed. ₇Ek makke er twa kearûb-ingels. Hy makke se fan dreaun wurk, út ien stik mei de beide einen fan it soendeksel; ₈ien kearûb oan ’e iene en ien oan ’e oare ein fan it soendeksel. Hy makke de kearûbs út ien stik mei it deksel oan ’e beide einen dêrfan. ₉De kearûbs hienen de wjukken útspraat nei boppen ta en hja bedieken mei har wjukken it soendeksel. De gesichten wienen nei inoar ta. En de gesichten fan ’e kearûbs wienen nei it soendeksel takeard.

₁₀De tafel makke er fan akaziahout, twa jellen lang, ien jellen breed en oardel jellen heech. ₁₁Hy besloech dy mei suver goud en makke dêr in gouden list omhinne. ₁₂Hy makke dêr in râne fan in hanbreedte omhinne en in gouden list makke er om dy râne hinne. ₁₃Hy geat dêr fjouwer ringen oan. Dy ringen sette er oan ’e fjouwer hoeken by de fjouwer poaten. ₁₄De ringen sieten tsjin ’e râne oan, as hâlders foar de draachstokken, om de tafel te dragen. ₁₅De draachstokken makke er fan akaziahout en dy besloech er mei goud. Dy wienen om de tafel te dragen. ₁₆Hy makke ek it gerei dat op ’e tafel stie, de skûtels, pannen, kommen en de kannen om dêr út te jitten, fan suver goud.

₁₇Hy makke de ljochter fan suver goud. Hy hat de ljochter fan dreaun wurk makke: de poat, de buis, de tsjelken, de knoppen en de blommen wienen út ien stik dêrmei. ₁₈Seis buizen kamen út ’e siden wei. Trije buizen fan ’e ljochter út ’e iene en trije út ’e oare side. ₁₉Trije mangeltsjelken mei knop en blom oan ’e iene buis en trije oan ’e oare. Sa wienen de seis buizen dy’t út ’e ljochter weikamen.

₂₀En oan ’e ljochter seis fjouwer mangeltsjelken mei knoppen en blommen. ₂₁In knop ûnder it iene pear buizen, in knop ûnder it twadde pear en in knop ûnder in tredde pear, dus oan ’e seis buizen dy’t út ’e ljochter weikamen. ₂₂De knoppen en de buizen fan ’e ljochter wienen mei de ljochter út ien stik, it gehiel dreaun út ien stik suver goud. ₂₃Hy makke dêr sân lampen foar mei snuters en lekbakjes, fan suver goud. ₂₄Hy hat it út in talint suver goud makke mei alle gerei dêrby.

₂₅Hy makke ek it rookofferalter fan akaziahout. It wie fjouwerkant, ien jellen lang en ien jellen breed. De hichte wie twa jellen. De hoarnen wienen dêrmei út ien stik. ₂₆Hy besloech it mei suver goud, de boppekant en de siden yn it rûnom en de hoarnen dêrfan. En dêromhinne makke er in gouden list. ₂₇Hy makke dêr twa gouden ringen foar, ûnder oan ’e list, oan twa sydkanten, dus oan beide siden, as hâlders foar de draachstokken om it dêrmei te dragen. ₂₈De draachstokken makke er fan akaziahout en dy besloech er mei goud.

₂₉Ek makke er de hillige salvingsoalje en it rookwurk fan suvere krûderijen, as salvemingerswurk.