Exodus 35

₁Mozes liet de hiele gemeente fan ’e Israeliten byinoarkomme en hy sei tsjin har: Dit binne de dingen dy’t de Heare opdroegen hat en dy’t dien wurde moatte. ₂Seis dagen silst wurk dwaan, mar de sânde dei sil jimme hillich wêze, in folsleine rêstdei foar de Heare. Elk dy’t dan wurk docht, sil stjerre. ₃Jimme meie op ’e sabbatdei yn gjinien fan jimme wenten fjoer oanstekke.

₄Fierder sei Mozes tsjin ’e hiele gemeente fan ’e Israeliten: Dit is it wat de Heare my opdroegen hat: ₅Nim út jim besit in wijjefte foar de Heare. Lit alleman, waans herte him dêrta driuwt, in wijjefte foar de Heare bringe: goud, sulver, brûns, ₆pearse, poarperreade en karmozynkleurige wol, fyn linnen en geitehier, ₇readferve rammehûden, dassehûden en akaziahout, ₈oalje foar de ferljochting, balsem foar salfoalje en foar swietrokige krûden, ₉sjohamstiennen en stiennen om yn ’e efod en yn it boarstskyld te setten.

₁₀Dan moatte alle faklju dy’t jim hawwe komme en meitsje alles dat de Heare opdroegen hat: ₁₁de wenning mei de tinte en it tek derfoar, de heakken, planken, dwersklampen en de pylders mei de fuotstikken; ₁₂ek de arke mei de draachstokken en it soendeksel en it foarkleed ta ôfskieding, ₁₃de tafel mei de draachstokken en alle gerei dat derby heart en de toanbreaën; ₁₄ek de ljochter foar de ferljochting mei it gerei dat derby heart en lampen dêrfan mei de oalje foar de ferljochting; ₁₅it rookofferalter mei de draachstokken en de salfoalje en swietrokige krûden; ek it gerdyn foar de yngong, de yngong fan ’e wenning; ₁₆it brânofferalter mei it brûnzen roaster dat derby heart, de draachstokken en alle gerei derby; ek it waskfet mei it fuotstik; ₁₇de kleden foar it foarhôf en de pylders mei de fuotstikken en it gerdyn foar de poarte fan it foarhôf; ₁₈de pinnen foar de wenning, de pinnen foar it foarhôf en de touwen dêrfoar; ₁₉dan de amtsklean foar de tsjinst yn it hillichdom: de hillige klean foar Aäron, de pryster, en de klean foar dy syn soannen as dy as pryster tsjinst dogge.

₂₀Doe gong de hiele gemeente fan ’e Israeliten by Mozes wei. ₂₁En hja kamen! Alleman waans herte him dêrta dreau en elk dy’t reewillich fan geast wie, brocht de Heare in wijjefte foar it wurk oan ’e tinte fan ’e moeting en foar de hiele tsjinst dêryn en foar de hillige klean. ₂₂Hja kamen, manlju en froulju beide, allegearre mei in reewillich herte. Hja brochten sierspjelden, earringen, fingerringen en halssieraden, allegear goudguod. Allegearre dy’t de Heare in gouden beweechoffer brochten ₂₃en elk dy’t pearse, poarperreade en karmozynkleurige wol yn syn besit hie, en fyn linnen, geitehier en readferve ramme- en dassehûden, dy brocht dat. ₂₄Elk dy’t in wijjefte offere fan sulver of fan brûns, brocht dat as in wijjefte foar de Heare en elk dy’t akaziahout yn besit hie dat gaadlik wie om by it wurk te brûken, brocht dat.

₂₅Alle keunstsinnige froulju spûnen eigenhandich en wat se spûn hienen oan pearse, poarperreade en karmozynkleurige wol en fyn linnen, dat brochten se. ₂₆Ek spûnen alle keunstsinnige froulju, waans herte har dêrta dreau, it geitehier. ₂₇Foaroansteande lju brochten de chrysopraasstiennen, en de stiennen om yn ’e efod en it boarstskyld te setten, ₂₈en de balsem mei de oalje foar de ferljochting en foar de salfoalje en de swietrokige krûden foar it rookoffer. ₂₉Alle manlju en froulju dy’t inerlik oantrune waarden om wat te bringen foar it wurk dat de Heare troch de tsjinst fan Mozes hjitten hie te dwaan – de Israeliten brochten it as in frijwillich offer foar de Heare.

₃₀Mozes sei tsjin ’e Israeliten: Sjoch, de Heare hat Besaleël, de soan fan Oery, de soan fan Chûr, út ’e stam Juda, by namme roppen ₃₁en Hy hat him fol makke fan de Geast fan God, fan wysheid, ynsjoch en kennis fan alle soarten wurk, ₃₂dat hy kin bestekken opmeitsje en útfiere yn goud, sulver en brûns, ₃₃edelstiennen gravearje en ynsette, en houtsnijwurk en alle soarten wurk, dat ûntwurpen is, útfiere. ₃₄Hy hat him en ek Oholiab, de soan fan Achisamak, út ’e stam Dan de jefte jûn om ûnderrjocht te jaan. ₃₅Hy hat harren kundichheid jûn, om alle soarten wurk te dwaan, dat fan in hantwurksman, mar ek dat fan in ûntwerper, dat fan in borduerder yn himelsblauwe, poarperreade en karmozynkleurige wol en fyn linnen en dat fan in wever, ja dat fan alle soarten wurkers, ek dat fan fakkundige ûntwerpers.