Exodus 30

₁Do moatst in alter meitsje om rookwurk yn reek opgean te litten. Fan akaziahout moatst it meitsje. ₂It moat in jellen lang en in jellen breed wêze, dus fjouwerkant en twa jellen heech. De hoarnen moatte út ien stik dêrmei wêze. ₃Do moatst it mei suver goud beslaan, it boppeflak en de siden yn it rûnom en de hoarnen dêrfan. In gouden list moatst dêr omhinne meitsje. ₄Twa gouden ringen moatst dêroan meitsje, ûnderoan de list; oan ’e beide siden moatst dy meitsje, oan ’e beide sydkanten as hâlders foar de draachstokken, dat it dêrmei droegen wurde kin. ₅De draachstokken moatst fan akaziahout meitsje en dy mei goud beslaan.

₆Do moatst it foar it foarkleed delsette, dat foar de arke mei de ferbûnsakte is, foar it soendeksel dat op de ferbûnsakte leit en dêr’t Ik mei dy gearkomme sil.

₇En dêrop sil Aäron swietrokige krûden yn reek opgean litte. Elke moarntyd, as er de lampen skjinmakket, sil er it yn reek opgean litte. ₈Ek as Aäron de lampen yn ’e skimerjûn opstekt, dan sil er it yn reek opgean litte, as in fêst rookoffer foar de Heare, foar jim geslachten. ₉Dêr mei gjin frjemd rookoffer op brocht wurde, ek gjin brânoffer of moaloffer, en in drankoffer meist der net oer útjitte. ₁₀En ienris jiers sil Aäron op de hoarnen dêrfan fersoening dwaan. Mei wat fan it bloed fan it sûnde-offer-ta-fersoening sil er dêr fersoening op dwaan foar jimme geslachten. Heechhillich is dit alter foar de Heare.

₁₁En de Heare sei tsjin Mozes: ₁₂Asto it tal fan ’e Israeliten opnimst yn in folkstelling, dan moat elk, dy’t teld wurdt, in soenjild jaan oan de Heare foar syn libben, dat der ûnder har gjin pleach komt by dat tellen. ₁₃Dit moatte allegearre jaan dy’t nei de telden oergeane: in heale sikkel neffens de hillige sikkel, de sikkel fan tweintich geara. Dy heale sikkel is in heffing foar de Heare. ₁₄Elk dy’t nei de telden oergiet, fan tweintich jier en âlder, moat de Heare de heffing betelje. ₁₅De rike sil net mear en de earme net minder jaan as in heale sikkel, as in heffing foar de Heare, om fersoening foar jim libben te dwaan. ₁₆Do moatst it soenjild fan ’e Israeliten barre en dat jaan foar de tsjinst yn ’e tinte fan ’e moeting. Dat sil foar de Israeliten yn oantinken bliuwe by de Heare, om fersoening foar jim libben te krijen.

₁₇En de Heare sei tsjin Mozes: ₁₈Do moatst in brûnzen fet meitsje mei dêr in brûnzen fuotstik by foar it waskjen. Do moatst it in plak jaan tusken de tinte fan ’e moeting en it alter en dêr wetter yn dwaan. ₁₉Aäron en syn soannen moatte har dêr de hannen en de fuotten yn waskje. ₂₀As se nei de tinte fan ’e moeting yngeane, moatte se har earst mei wetter waskje, dat se net stjerre sille. Ek as se nei it alter tageane om tsjinst te dwaan en it fjoeroffer foar de Heare yn reek opgean litte, ₂₁dan moatte se har earst de hannen en de fuotten waskje, dat se net stjerre sille. Dat sil in altydduorjend foarskrift wêze foar him en foar syn soannen fan âlder op âlder.

₂₂De Heare sei tsjin Mozes: ₂₃Do dan, nim fan ’e bêste krûderijen; 500 sikkel natuerlik útdripte mirre en fan swietrokige kaniel, heal safolle, 250 sikkel, en ek 250 sikkel swietrokige kalmus, ₂₄en ek 500 sikkel kassia neffens de hillige sikkel en in hyn olive-oalje. ₂₅Dêr moatst hillige salfoalje fan meitsje, in mongen salve fan salvemingerswurk. It sil in hillige salvingsoalje wêze.

₂₆Dêr moatst de tinte fan ’e moeting mei salvje en de arke mei de ferbûnsakte. ₂₇Fierders de tafel mei alle gerei, de ljochter mei it gerei en it rookofferalter, ₂₈it brânofferalter mei alle gerei en it waskfet mei it fuotstik. ₂₉Dat moatst hilligje en it sil heechhillich wêze. Allegearre dy’t dêr oankomme, sille hillich wêze.

₃₀Ek Aäron en syn soannen moatst salvje en har hilligje, om My as pryster te tsjinjen. ₃₁En tsjin ’e Israeliten moatst sizze: Dit is tenei myn hillige salvingsoalje, al jimme geslachten troch. ₃₂It lichem fan in gewoan minske mei it net oer útgetten wurde en yn in gearstalling lykas dizze, meie jimme it net meitsje. It is hillich en it sil foar jimme hillich wêze. ₃₃Elk dy’t it krektsa gearstalt en dêrfan op immen smart, dy’t dêr gjin rjocht op hat, sil útroege wurde út syn folk.

₃₄En de Heare sei tsjin Mozes: Nim krûderijen, balsemhars, nagel en gomhars, swietrokige krûden en suvere wijreek, fan alles likefolle. ₃₅Meitsje dêr rookwurk fan, in mingsel fan krûdemingers, goed mongen, suver en hillich. ₃₆Dan moatst dêr in part fan tige fyn wriuwe en dêr wat fan lizze foar ’e ferbûnsakte yn ’e tinte fan ’e moeting, dêr’t Ik mei dy gearkomme sil. It sil jimme heechhillich wêze. ₃₇Foar jimsels meie jim gjin rookwurk meitsje yn ’e selde gearstalling sast it makke hast. It sil foar jimme wijd wêze oan de Heare. ₃₈Elk dy’t it krektsa makket om dêroan te rûken, sil útroege wurde út syn folk.