Exodus 28

₁Do moatst Aäron mei syn soannen út it fermidden fan ’e Israeliten by dy komme litte, om My as pryster te tsjinjen: Aäron en syn soannen, Nadab en Abihû, Eleäzer en Itamar. ₂Dan moatst hillige klean meitsje foar dyn broer Aäron, dy’t him weardichheid en oansjen jouwe. ₃En do moatst prate mei alle faklju, dy’t Ik bejeftige haw mei in keunstsinnige geast. Dy sille de klean fan Aäron meitsje om him wijing te jaan, dat er My as pryster tsjinje kin. ₄Dit binne de klean, dy’t se meitsje moatte: In boarstskyld, in efod, in mantel, in ûnderkleed mei rútsjes, in tulbân en in mulbân. Hja sille hillige klean meitsje foar dyn broer Aäron en foar syn soannen, dat se My as pryster tsjinje kinne. ₅Hja moatte dêrfoar it goud, de pearse, poarperreade en karmozynkleurige wol en it fine linnen nimme.

₆De efod moatte se meitsje fan goud, pearse, poarperreade en karmozynkleurige wol en fyn twynd linnen, keunstich fakwurk. ₇Twa skouderbannen moatte deroan sitte, oan ’e beide einen ien, om him dêrmei fêst te meitsjen. ₈De bân oan ’e efod dêr’t er mei fêstmakke wurdt, moat op deselde wize bewurke wurde en út ien stik dêrmei wêze, fan goud, pearse, poarperreade en karmozynkleurige wol en fan fyn twynd linnen. ₉Dan moatst twa chrysopraasstiennen nimme en gravearje dêr de nammen fan ’e soannen fan Israel yn. ₁₀Seis fan har nammen op ’e iene stien en de seis oerbliuwende nammen op ’e oare stien, fan ’e âldste ôf. ₁₁As stiensnijerswurk, sa’t segelringen gravearre wurde, sa moatst de nammen fan ’e soannen fan Israel yn beide stiennen gravearje. Dan moatst se rûnom yn gouden settings dwaan. ₁₂Fierders moatst de beide stiennen op ’e skouderstikken fan ’e efod sette; se bringe de Heare de Israeliten aloan wer yn it sin, mei’t Aäron har nammen foar de eagen fan de Heare op ’e beide skouders draacht. ₁₃De settings moatst fan goud meitsje, ₁₄en dan noch twa kettinkjes, fan suver goud smeid. As frisselwurk moatst se meitsje en de frissele kettinkje moatst fêstmeitsje oan ’e settings.

₁₅Do moatst in boarstskyld foar rjochtsútspraken meitsje. Keunstich wurk moatst dêrfan meitsje, lykas it wurk oan ’e efod; fan goud, pearse, poarperreade en karmozynkleurige wol moatst it meitsje. ₁₆As it dûbelteard is, moat it fjouwerkant wêze, in span lang en in span breed. ₁₇Do moatst it hielendal fol sette mei stiennen, fjouwer rigen stiennen: in reade jaspis, in chrysolyt en in malachyt op ’e earste rige, ₁₈op ’e twadde rige in hematyt, in lazuerstien en in prasem; ₁₉op ’e tredde rige: in barnstien, in agaat en in ametist; ₂₀op ’e fjirde rige: in turkoais, in chrysopraas en in nefryt. Dy moatte yn gouden settings pleatst wurde. ₂₁De stiennen sille neffens de nammen fan ’e soannen fan Israel wêze: tolve stiennen neffens har nammen. Elk gravearre as in segelring mei syn namme. Sa moat it wêze foar de tolve stammen.

₂₂Do moatst op it boarstskyld draaide kettinkjes meitsje, frisselwurk, smeid fan suver goud. ₂₃Ek moatst op it boarstskyld twa gouden ringen meitsje en dy twa ringen oan ’e beide einen fan it boarstskyld fêstmeitsje. ₂₄De beide gouden frissels moatst oan ’e beide ringen oan ’e einen fan it boarstskyld fêstmeitsje. ₂₅En twa einen fan ’e frissels moatst fêstmeitsje oan ’e settings en dy moatst oan ’e skouderstikken fan ’e efod sette, oan ’e foarkant.

₂₆Dan moatst noch twa gouden ringen meitsje en dy oan ’e beide einen fan it boarstskyld sette, oan ’e binnenkant fan ’e siden dy’t tsjin de efod oansit. ₂₇En twa gouden ringen moatst meitsje en dy op ’e beide skouderstikken fan ’e efod fêstmeitsje, ûnder oan ’e foarkant, tichteby de ferbining, boppe de mulbân fan ’e efod. ₂₈Dan moatte se it boarstskyld mei syn ringen en mei in pearse koarde ferbine oan ’e ringen fan ’e efod, dat it boppe de mulbân fan ’e efod bliuwt en it boarstskyld net fan ’e efod ôfskoot.

₂₉En Aäron, as er yn it hillichdom komt, moat de nammen fan ’e soannen fan Israel op it boarstskyld-foar-rjochtsútspraken op syn hert drage, om in oanhâldend oantinken foar de eagen fan de Heare te wêzen. ₃₀En do moatst yn it boarstskyld-foar-rjochtsútspraken de Oerim en de Tûmmim oanbringe. Dy moatte op Aäron syn hert wêze as hy foar de Heare komt. Sa sil Aäron, as er foar de eagen fan de Heare komt, it rjocht fan ’e Israeliten oanhâldend op it hert drage.

₃₁De mantel by de efod moatst alhielendal pears meitsje. Yn ’e midden dêrfan moat in iepening foar de holle wêze. ₃₂Om dy iepening hinne moat in bân weefd wurde, krekt as by de iepening yn in pânser, dat it net ynskuort. ₃₃En oan ’e seamen dêrfan moatst granaatappels meitsje fan pears, poarperread en karmozynkleur, rûnom oan alle seamen. En dêrtusken, ek yn it rûnom, gouden beltsjes. ₃₄Gouden beltsjes en granaatappels om de oare, rûnom oan ’e seamen fan ’e mantel. ₃₅Aäron moat dy mantel oanhawwe as er tsjinst docht, en it lûd dêrfan moat te hearren wêze, as er yn it hillichdom komt foar de Heare en as er dêr útkomt. Oars soed er stjerre.

₃₆Meitsje ek in plaat fan suver goud en gravearje dêryn op ’e wize fan in segelring: De Heare tawijd. ₃₇Dy plaat moatst mei in pearse koarde oan ’e tulbân fêstmeitsje. Oan ’e foarkant fan ’e tulbân moat dy sitte. ₃₈Sa sil Aäron dy op ’e foarholle hawwe en Aäron sil de ûngerjochtichheid weinimme fan ’e hillige dingen, dy’t de Israeliten wijd hawwe. Dit jildt foar al har wijde offerjeften. Dy plaat sil er altydtroch op ’e foarholle hawwe, om foar har wolbehagen te bewurkjen foar de Heare.

₃₉Do moatst in fyn linnen ûnderkleed weve en in fyn linnen tulbân meitsje en in mulbân moatst meitsje mei borduerwurk.

₄₀Fierders moatst foar de soannen fan Aäron ûnderklean meitsje en ek mulbannen en kappen moatst foar har meitsje ta eare en ta sieraad. ₄₁Dy klean moatst dyn broer Aäron en ek syn soannen oandwaan, har salvje en har oanstelle en wije, om My as pryster te tsjinjen. ₄₂Meitsje har ek linnense broeken om har bleate skamte te bedekken. Dy moatte har fan ’e mul ôf oant boppe de knibbels komme. ₄₃Aäron en syn soannen moatte dy oanhawwe as se yn ’e tinte fan ’e moeting komme of as se by it alter komme om tsjinst te dwaan yn it hillichdom, dat se gjin skuld op har lade en stjerre soenen. Dat is in foarskrift foar altyd, foar him en foar syn neigeslacht.