Psalmen 87

De stêd dy’t Er stichte op hillige bergen,

dêr hâldt de Heare fan;

₂fan Sions poarten mear

as fan alle wensteden fan Jakob.

₃Pryslike dingen wurde ferteld

fan dy, o stêd fan God.

₄Ik rekkenje Rahab en Babel ta myn kunde,

ja sels Filistéa en Tyrus mei Etiopië,

as wienen se dêr berne.

₅Mar fan Sion sizze se:

Elk foar oar is dêr berne –

Hy, de Heechste leit it foar har fêst.

₆De Heare rekkent by it opskriuwen fan ’e folken:

Dy en dy is dêr berne.

₇De sjongers mei de dûnsers

allegearre sjonge se fan dy!