Psalmen 48

₂Grut is de Heare en tige te priizjen

yn ’e stêd fan ús God.

₃Syn hillige berch, dy sierlike hichte,

is in freugde foar de hiele ierde.

De Sionsberch, de hege noardkant,

is de stêd fan in grut kening.

₄God hat him yn har sterke bouwurken

kenne litten as in sterke stins.

₅Want sjoch, keningen keppelen gear

en kamen oer de grinzen,

₆mar se seagen net op, of se bestoaren it,

ferbjustere spilen se de wyk;

₇beving befong harren dêr,

bangens as fan in bernjende frou;

₈krekt as hie de eastewyn

Tarsjisjfarders teplettere.

₉Sa’t wy al heard hienen,

seagen wy it no sels

yn ’e stêd fan de Heare Almachtich,

de stêd fan ús God,

dy’t Hy foar ivich fêstset hat.

₁₀Wy betinke jo genede

binnen yn jo timpel.

₁₁Likegoed as jo namme, o God,

rikt jo lof oan ’e ein fan ’e ierde ta.

₁₂De Sionsberch is bliid,

de stêden fan Juda jubelje

om jo oardielen.

₁₃Rin om ’e Sion hinne,

tel syn tuorren,

₁₄nim syn bolwurken goed op,

meunsterje syn hechte bouwurken,

en ferhelje dan de jongerein:

₁₅Hjir is no God,

foar ivich en altyd ús God;

Hy sil ús liede oan ’e dea ta.