Psalmen 47

₂Folken allegearre, klap yn ’e hannen,

sjong God ta mei lûd gejubel.

₃Want de Heare, de Heechste, is ûntsachlik,

in grut kening is Hy oer de hiele ierde.

₄Folken makket Er foar ús lytsman,

naasjes leit Er ús ûnder de fuotten.

₅Hy hat dit erfskip foar ús útkeazen,

de gloarje fan Jakob

dêr’t Hy it mei hâldt.

₆God is opfearn ûnder gejubel,

de Heare ûnder lûd bazúnjen.

₇Sjong foar ús God, ja sjong,

sjong foar ús Kening, ja sjong.

₈Want kening oer de hiele ierde is God,

sjong foar Him in keunstich liet.

₉God is kening wurden oer de folken,

God hat him set op syn hillige troan.

₁₀De eallju fan ’e folken binne gearkommen

as it folk fan Abrahams God,

want de machtigen op ierde binne God sines;

heech ferheven is Hy.