Psalmen 110

Dit wie de Godsspraak fan ’e Heare oan myn hear:

Gean sitten oan myn rjochterhân,

oant Ik fan dyn fijannen

dij in fuotbank meitsje.

₂De skepter fan jo macht

mei de Heare jo oanrikke út Sion wei.

Hearskje middenmank jo fijannen.

₃Jo folk stiet klear

de deis dat jo jo macht sjen litte;

yn hillige pronk

stiet de jongerein foar jo ree

as de dauwe út ’e skurte fan ’e dage.

₄De Heare hat sward

en it komt Him net te muoien:

Do bist foar ivich pryster

op ’e wize fan Melchisédek.

₅De Hear stiet oan jo rjochterhân.

No teplettert Er keningen,

as syn grime losbarst.

₆Hy rjochtet de folken,

besieddet de lannen mei liken,

teplettert koppen

op it wide fjild.

₇Hy drinkt ûnderweis út ’e beek,

dan kin er de holle wer tille.