Nehemia syn noed foar it folk
1Doe’t de muorre ôfboud wie, wie it safier, dat ik de doarren der ynsette liet. De poartewachters, de leviten en de sjongers, waarden oansteld. 2Ik joech myn broer Chanany it bestjoer oer Jeruzalem, mei Chananja, de oerste fan ’e stins, want dat wie in fertroud man, dy’t ûntsach foar God hie, mear as gâns oaren. 3En ik sei tsjin har: De poarten fan Jeruzalem meie net iependien wurde foar’t de sinne hjit is, en net oars as mei de wachten derby. As se de doarren ticht dogge, moatte se dy skoattelje. Der moatte om bar wachters fan ’e ynwenners fan Jeruzalem op post stean, elk yn syn ôfdieling en foar syn hûs oer.
4De stêd wie rom en grut fan bestek, mar der wienen in bytsje minsken yn en de huzen wienen noch net wer opboud. 5Doe joech myn God my yn, de hege hearen en de riedslju mei it folk byinoar te bringen om se yn ’e befolkingslisten opnimme te litten. Ik fûn derby it boek mei de list fan harren dy’t it earst weromkommen wienen. Ik fûn dan dêryn dit beskreaun.
Earste list fan dy’t weromkommen binne
6Dit binne de lju fan ’e provinsje dy’t yn ballingskip sitten hawwe en no weromkommen binne. Kening Nebûkadnessar fan Babel hie har dêrhinne ferballe. Hja gongen werom nei Jeruzalem en Juda, in elk nei syn stêd. 7Hja kamen mei Serûbbabel, Jesjûa, Nehemia, Azarja, Raämja, Nachamany, Mordekai, Bilsjam, Mispêret, Bigwai, Nechûm en Baäma. 8It tal fan ’e mannen fan it folk Israel: de soannen fan Parosj: 2172, 9de soannen fan Sjefatja: 372, 10de soannen fan Arach: 652, 11de soannen fan Pachat-Moäb, dat is te sizzen de soannen fan Jesjûa en Joäb: 2818, 12de soannen fan Elam: 1254, 13de soannen fan Sattû: 845, 14de soannen fan Sakkai: 760, 15de soannen fan Binnûi: 648, 16de soannen fan Bebai: 628, 17de soannen fan Azgad: 2322, 18de soannen fan Adonikam: 667, 19de soannen fan Bigwai: 2067, 20de soannen fan Adin: 655, 21de soannen fan Atar, dat is te sizzen Chizkia: 98, 22de soannen fan Chasjûm: 328, 23de soannen fan Bezai: 324, 24de soannen fan Charif: 112, 25de soannen fan Gibeön: 95, 26de mannen fan Betlehem en Netofa: 188, 27de mannen fan Anatot: 128, 28de mannen fan Bet-Azmawet: 42, 29de mannen fan Kirjat-Jeärim, Kafira en Beërot: 743, 30de mannen fan Rama en Gaba: 621, 31de mannen fan Mikmas: 122, 32de mannen fan Bet-Al en Ai: 123, 33de mannen fan it oare Nebo: 52, 34de soannen fan de oare Elam: 1254, 35de soannen fan Charim: 320, 36de soannen fan Jericho: 345, 37de soannen fan Lod, Chadid en Ono: 721, 38de soannen fan Senaä: 3930, 39de prysters, de soannen fan Jedaja, dat is te sizzen it hûs fan Jesjû: 973, 40de soannen fan Immer: 1052, 41de soannen fan Pasjchûr: 1247, 42de soannen fan Charim: 1017,
43de leviten; de soannen fan Jesjûa, dat is te sizzen Kadmiël en de soannen fan Hodewa: 74,
44de sjongers; de soannen fan Asaf: 148, 45de poartewachters; de soannen fan Sjallûm, de soannen fan Ater, de soannen fan Talmon, de soannen fan Akkûb, de soannen fan Chatita en de soannen fan Ajobai: 138,
46it wurkfolk fan ’e timpeltsjinst; de soannen fan Sicha, de soannen fan Chasûfa, de soannen fan Tabbaot, 47de soannen fan Kearim, de soannen fan Sia, de soannen fan Padon, 48de soannen fan Lebana, de soannen fan Hagaba, de soannen fan Salmai, 49de soannen fan Chanan, de soannen fan Giddel, de soannen fan Gachar, 50de soannen fan Reäja, de soannen fan Rezin, de soannen fan Nekoda, 51de soannen fan Gazzam, de soannen fan Oezza, de soannen fan Paséach, 52de soannen fan Besai, de soannen fan Meûnim, de soannen fan Nefûsjsim, 53de soannen fan Bikbûk, de soannen fan Chakûfa, de soannen fan Charchûr, 54de soannen fan Daslit, de soannen fan Mechida, de soannen fan Charsja, 55de soannen fan Barkos, de soannen fan Sisera, de soannen fan Temach, 56de soannen fan Neziach en de soannen fan Chatifa.
57De neiteam fan Salomo’s feinten; de soannen fan Sotai, de soannen fan Sofêret, de soannen fan Perida, 58de soannen fan Jaäla, de soannen fan Darkom, de soannen fan Giddel, 59de soannen fan Sjefatja, de soannen fan Chattil, de soannen fan Pokêret-Hassebaïm en de bern fan Amon. 60It hiele wurkfolk fan ’e timpeltsjinst en de neiteam fan Salomo’s feinten binne mei-inoar: 392.
61En dit binne deselden dy’t út Tel-Mêlach, Tel-Charsja, Kêrûb Adon en Immer optein binne, mar se koenen net meidiele, wa’t har foarfaars wienen en oft se wol út it skaai fan Israel wienen:
62de soannen fan Delaja, de soannen fan Tobía, de soannen fan Nekoda: 642.
63Fan de prysters wienen dat dizzen: de soannen fan Chabaja, de soannen fan Hakkos en de soannen fan Barzillai, dat is fan ien dy’t mei ien fan ’e dochters fan Barzillai troud wie en no mei har fan neamd waard. 64Dy hawwe de stamlist neisocht, mar hy wie der net yn te finen, dat se waarden as ûnrein fan it prysterskip útsletten. 65De steedhâlder hiet har, dat se net fan it allerhillichste ite mochten, oant der wer in pryster stean soe mei de stiennen fan Ljocht en Wierheid.
66De hiele gemeente mei-inoar bestie út 42.360 man, 67útsein har slaven en slavinnen. Dêr wienen 7337 fan. Sjongers en sjongsters hienen se 245. 68Oan kemielen 435; oan ezels 6720.
69In part fan ’e famyljehaden joegen ta it wurk. De steedhâlder joech foar it fûns: tûzen drachmen oan goud, fyftich sprinkelskalen en tritich pakken prysterklean.
70En guon fan ’e famyljehaden joegen foar de arbeidskas: oan goud tweintich tûzen drachmen en oan sulver twaëntweintich hûndert pûn. 71En wat it oare folk joech wie oan goud tweintich tûzen drachmen, oan sulver twa tûzen pûn en sânensechstich pakken prysterklean.
72De prysters, de leviten, de poartewachters, de sjongers, ek in part fan it folk en it wurkfolk by de timpeltsjinst wennen yn har eigen stêden, krekt as hiele Israel.
