Lukas 21

₁Hy seach, hoe’t de rike minsken har jeften yn ’e offerkiste stoarten. ₂Hy seach ek, hoe’t in earme widdo der twa sinten yn die. ₃Doe sei Er: Wier, Ik sis jimme, dy earme widdo hat der it measte fan allegearre yn dien. ₄Al dy oaren ommers hawwe wat offere fan har rykdom, mar sij hat der fan har earmoed alles yn dien, wat se hie om fan te libjen.

₅Doe’t guon it deroer hienen, hoe prachtich de timpel wie mei syn moaie stiennen en wijjeften, sei Er: ₆Der komt in tiid dat der fan al wat jimme sjogge, gjin stien op ’e oare litten wurdt. It giet allegear yn pún.

₇Doe fregen se Him: Master, wannear sil dat wêze? en: Hok teken kinne wy oan sjen dat it begjint? ₈Hy sei: Tink derom, dat jimme net op ’e doele reitsje. Der sille hiel wat komme, dy’t ûnder myn namme sizze: Ik bin it, en: De tiid is kommen. Rin sokken net achternei. ₉Reitsje net fan ’e wize, as jimme hearre fan oarloggen en revolúsjes, want dat moat earst allegear komme. Mar dêrom is de ein der fuort noch net.

₁₀Doe sei Er tsjin harren: Folk sil tsjin folk stean en keninkryk tsjin keninkryk. ₁₁Der sille swiere ierdskokken wêze en pest en hongersneed, no hjirre, dan dêre. Bjusterbaarlike dingen sille der barre. Oan ’e loft komme grutte tekens. ₁₂Mar ear’t dat allegearre safier is, sille se jimme oanpakke en ferfolgje, se sille jimme oerleverje oan ’e synagogen, achter ’t slot sette en jimme opbringe foar keningen en steedhâlders, omdat jimme My folgje. ₁₃Dan wurdt it getugen foar jimme! ₁₄Tink derom, dat jim net yn ’t foar jim ferdigening tariede. ₁₅Want Ik sil jimme wurden yn ’e mûle jaan en wysheid dêr’t gjinien fan jimme tsjinstanners tsjin opwoeksen is en ek mar wat tsjinyn bringe kin.

₁₆Ja, jimme sille útlevere wurde troch jim eigen âlden, bruorren en susters, famylje en freonen. Guon fan jimme sille se deadzje ₁₇en elkenien sil jimme haatsje om myn namme. ₁₈Mar net in hier fan ’e holle sille jim dêrtroch kwytreitsje. ₁₉Troch út te hâlden winne jimme jim libben.

₂₀As jimme om hiele Jeruzalem hinne legers sjogge, rekkenje der dan mar op, dat de ferwoesting fan ’e stêd neioan is. ₂₁Dan moatte de lju yn Judéa ûntwyk sykje it berchlân yn. Dy’t yn ’e stêd binne, moatte besykje om derút te kommen. Dy’t bûtenút tahâlde, moatte de stêd net yngean, ₂₂want dagen fan wraak sille it wêze, as alles útkomt wat yn ’e Skrift stiet.

₂₃Earme froulju, dy’t yn dy dagen yn ferwachting binne of in bern oan it boarst hawwe, want grutte need sil der oer it lân komme en dit folk sil Gods grime fiele. ₂₄Guon sille falle troch it skerpe swurd, oaren as kriichsgefangenen weifierd wurde nei de lannen fan alle folken. Jeruzalem sil troch de heidens fertrape wurde, oant de tiid fan ’e heidens ek om is.

₂₅Der sille frjemde dingen barre mei de sinne, de moanne en de stjerren. Op ierde sille de folken yn grutte noed sitte en net witte, hoe’t se ûntkomme moatte oan ’e bolderjende en skomjende see. ₂₆De minsken sille it bestjerre fan eangst en spanning om wat der oer de wrâld komme sil, want it stjerreleger sil yn ûntstjoer reitsje.

₂₇Dan sille se de Minskesoan kommen sjen op in wolk mei grutte macht en majesteit. ₂₈Wannear’t dat allegearre begjint, kom dan oerein en stek de holle op, want jimme ferlossing is neioan.

₂₉Hy fertelde harren in gelikenis. Sjoch ris nei de figebeam en alle oare beammen. ₃₀Sagau’t jim dy útrinnen sjogge, witte jimme út jimsels, dat it hast simmer is. ₃₁Sa moatte jimme ek witte: As jimme dy dingen barren sjogge, dan is Gods ryk neioan. ₃₂Ja, Ik sis jimme: De minsken fan no sille dat allegearre noch belibje. ₃₃Himel en ierde sille foarbygean, mar myn wurden sille net foarbygean.

₃₄Pas op, dat jim net yn ’e sûs reitsje troch in los libben, dronkenskip en de soargen om it bestean, en dat dy dei jimme net oer it mad komt. ₃₅Want as in net sil dy dei falle oer allegearre, wêr’t se op ierde ek wenje.

₃₆Wês dan ek altyd wach en bid dat jimme de krêft hawwe meie om te ûntkommen oan al wat der wankt, en te bestean foar de Minskesoan.

₃₇Deis joech Er ûnderrjocht yn ’e timpel; jûns gong Er de stêd út en oernachte dan op ’e berch dy’t de Oliveberch neamd wurdt. ₃₈Moarns betiid kaam al it folk dan by Him yn ’e timpel om Him te hearren.