Hoséa 7

₁komt Efraïms ûngerjochtichheid oan it ljocht,

de kweade stikken fan Samaria;

want se dogge gemiene dingen:

dieven brekke yn en bûtendoar binne rovers yn aksje.

₂Se steane der net by stil,

dat Ik al har minne streken goed ûnthâld.

Midden yn har kwea bedriuw sjoch Ik har foar My.

₃Mei har ûndogensheid fermeitsje se de kening,

mei har gemienens de hege hearen.

₄Huorkers binne it allegearre,

sa gleon as in oven,

dy’t de bakker net mear opstookt,

mei’t er al oan ’t daaimingen is,

krekt sa lang dat it riisd is.

₅Op ús kening syn jierfeest boarne se de hege hearen siik mei swiere wyn.

Hy sylt deryn mei dy dogeneaten;

₆as se taslagge, is har hert sa gleon fan glûpskens as in oven.

De hiele nacht troch smeult har grammoedichheid,

mar de oare moarns slacht de lôge derút.

₇Se binne allegearre sa gleon as in oven

en fertarre har regearders.

Sa binne har keningen de iene nei de oare fallen

en gjinien fan dat folk hat My oanroppen.

₈Efraïm lit him troch oare folken hinne riere,

Efraïm is as in pankoek dy’t net keard is.

₉Frjemden fertarre syn fermogens

en hy fernimt it net iens;

hy wurdt der griis en skier fan

en hat der gjin erch yn.

₁₀Ja, syn eigen heechmoed sprekt tsjin Israel.

Dochs binne se net by har God, de Heare, weromkommen;

wat se ek ûnderfûnen, se hawwe syn geunst net socht.

₁₁Sa is Efraïm wurden as in ûnnoazele do,

dy’t him sûnder euvelmoed ferrifelje lit.

Se roppe om Egypte, rinne nei Assyrië,

₁₂mar wêr’t se ek hinne rinne,

Ik beflap har ûnder myn net.

As fûgels helje Ik se del:

sa gau’t har kloft him hearre lit,

fang Ik se.

₁₃Wee harren, want se binne fan My ôfswalke;

ferdjer oer harren, want se binne My ûntrou wurden.

Ik woe harren loskeapje,

mar hja hawwe leagens oer My ferkundige.

₁₄Hja roppe My net fan herten oan,

mar se lizze op har bêd te jammerjen.

Om nôt en druvesop kervje se harsels,

mar tsjin My sette se it yn ’e kant.

₁₅Alhoewol’t Ik it bin, dy’t har ûnderrjochte

en har earms stjoer en krêft joech,

hawwe se kwea tsjin My yn it sin.

₁₆Hja sykje it by wat gjin baat jout,

se binne as in ûnwisse bôge.

Har grutte mannen sille falle troch it swurd,

wat se ek bestammerje mei har krompraterij yn Egypte.