Jozua 19

₁It twadde lot waard útbrocht foar Simeön foar de famyljes út ’e stam fan ’e Simeöniten. Har erfdiel lei midden yn dat fan ’e Judeeërs. ₂Hja hienen yn har erfdiel: Beër-Sjêba, Sjeba, Molada, ₃Chasar-Sjûal, Bala, Esem, ₄Eltolad, Betûl, Chorma, ₅Siklag, Bet-Hammarkabot, Chasar-Sûsa, ₆Bet-Lebaöt en Sjarûchan; trettjin stêden mei har doarpen. ₇Ajin, Rimmon, Eter en Asjan. Fjouwer stêden mei har doarpen. ₈Boppedat alle doarpen, dy’t om dy stêden hinne leinen, oan Baälat Beëar, it súdlike Rama, ta. Dat is it erfdiel fan ’e famyljes út ’e stam fan ’e Simeöniten. ₉It erfdiel fan ’e Simeöniten waard út dat fan ’e Judeeërs nommen, want it part fan ’e Judeeërs wie te grut foar harsels, dat de Simeöniten erfden midden yn har erfdiel.

₁₀It tredde lot waard útbrocht foar de famyljes fan ’e Sebûloniten. De grins fan har erfdiel rûn oan Sarid ta, ₁₁en dan giet de grins omheech it westen yn nei Marala en roert dan oan Dabbêsjet; dan roert dy oan ’e beek foar Jokneäm oer. ₁₂Fan Sarid út draait er nei it easten, nei sinne-opgong oer it gebiet fan Kislot-Tabor, rint nei Dobrat en dan omheech nei Jafia. ₁₃Dêrwei rint er it easten yn, nei sinne-opgong, nei Gat-Chefer, nei Et-Kasin en rint dan út op Rimmon, dat dat útleit nei Neä. ₁₄Dan bochtet de grins dêromhinne noard fan Channaton, en rint dan út yn ’e delling fan Jiftach-El. ₁₅Fierder Kattat, Nahalal, Sjimron, Jidale en Bet-Lêchem. Tolve stêden mei har doarpen. ₁₆Dat is it erfdiel fan ’e famyljes út ’e stam fan ’e Sebûloniten; dy stêden mei har doarpen.

₁₇It fjirde lot wie foar Issaskar, foar de famyljes fan ’e soannen fan Issaskar. ₁₈Har gebiet wie: Jizreël, Kesûlot, Sjûnem, ₁₉Chafarajim, Sjion, Anacharat, ₂₀Rabbit, Kisjon, Ebes, ₂₁Rêmet, En-Gannim, En-Chadda en Bet-Passes. ₂₂De grins roerde oan ’e Tabor, Sjachasima en Bet-Sjêmesj en rûn yn ’e Jordaan út. Sechstjin stêden mei har doarpen. ₂₃Dat is it erfdiel fan ’e famyljes fan ’e soannen fan Issaskar; de stêden mei har doarpen.

₂₄It fyfte lot wie foar de famyljes út ’e stam fan ’e soannen fan Azer. ₂₅Har gebiet wie Chelkat, Chaly, Bêten, Aksaf, ₂₆Alammêlek, Amad en Misjal. ₂₇It giet yn it westen roerend by de Karmel en by de stream Libnat lâns. ₂₈Dan bûcht it nei it easten nei Bet-Dagon, en rekket Sebûlon en de delling Jiftach-El yn it noarden, dat út nei Bet-Emek en Neïel en komt links fan Kabûl út. ₂₉Fierder Ebron, Rechob, Chamon en Kana oan Grut-Sidon ta. Dan bûcht de grins nei Rama oan ’e festingstêd Tyrus ta; dêrnei makket er in bocht nei Chosa, wylst er útrint yn ’e see, fan Chêbel nei Akzib. ₃₀Fierder Oema, Afek en Rechob; twaëntweintich stêden mei har doarpen. ₃₁Dat is it erfdiel fan ’e famyljes út ’e stam fan Azer syn soannen, dy stêden mei har doarpen.

₃₂It sechste lot wie foar de soannen fan Naftaly, foar de famyljes fan ’e soannen fan Naftaly. ₃₃Har grins rûn fan Chelef, fan ’e iik yn Saänannim, Adamy-Nêkeb en Jabneël nei Lakkûm, wylst dy útrûn yn ’e Jordaan. ₃₄Dan bûgde de grins it westen yn nei Asnot Tabor en rûn dêrwei troch nei Chûkok, en roerde yn it suden Sebûlon, Azer yn it westen en Juda, oan ’e Jordaan, yn it easten. ₃₅De festingstêden wienen: Siddim, Ser, Chammat, Rakkat, Kinnêret. ₃₆Adama, Rama, Chasor, ₃₇Kêdesj, Edreï, En-Chasor, ₃₈Jiron, Migda-El, Choarem, Bet-Anat en Bet-Sjêmesj. Njoggentjin stêden mei har doarpen. ₃₉Dat is it erfdiel fan ’e famyljes út ’e stam fan ’e soannen fan Naftaly, de stêden mei har doarpen.

₄₀It sânde lot wie foar de famyljes fan ’e stam fan ’e Daniten. ₄₁It gebiet fan har erfdiel wie: Soara, Esjtaöl, It-Sjêmesj, ₄₂Sjaälabbin, Ajalon, Jitla, ₄₃Elon, Timnata, Ekron, ₄₄Elteké, Gibbeton, Baälat, ₄₅Jehûd, Bené-Berak, Gat-Rimmon, ₄₆Mé-Jarkon, Rakkon mei de krite foar Jafo oer. ₄₇Doe’t lykwols it gebiet fan ’e Daniten foar har ferlern gong, trieken de Daniten op en strieden tsjin Lêsjem; hja namen it yn en fersloegen it mei it bleate swurd. Dêrop namen hja it yn besit en setten har dêr nei wenjen. Doe neamden hja Lêsjem: Dan, nei de namme fan har foarfaar Dan. ₄₈Dat wie it erfdiel fan ’e famyljes út ’e stam fan ’e Daniten: dy stêden mei har doarpen.

₄₉Doe’t hja klear kommen wienen mei it lân gebiet foar gebiet yn besit te jaan, joegen de Israeliten Jozua, de soan fan Nûn, in erfdiel yn har fermidden. ₅₀Op oarder fan de Heare joegen se him de stêd dêr’t er om frege hie: Timnat Sêrach yn it berchlân fan Efraïm. Hy boude de stêd op en sette him dêr nei wenjen.

₅₁Dat binne de erfdielen, dy’t pryster Eleäzar, Jozua, de soan fan Nûn, en de famyljehaden yn Sjilo foar de eagen fan de Heare, by de yngong fan de tinte fan ’e moeting oan ’e stammen fan ’e Israeliten troch it lot yn besit joegen.