Hannelingen 6

₁Yn dy tiid dat de learlingen wat langer wat machtiger waarden, begûnen op in stuit de Gryksktalige gemeenteleden op de Arameesktaligen te protteljen, omdat har widdowen by de deistige útdieling fan iten foarbypart waarden. ₂De tolve apostels rôpen alle learlingen byinoar en seinen: It heart sa net, dat wy de ferkundiging fan Gods wurd fersleaukje om foar it útdielen fan iten soargje te kinnen. ₃Sjoch dan, bruorren, om sân mannen út jimme fermidden, dêr’t in goede rop fan giet, dy’t ferstannich binne en fol fan ’e Geast, dat wy dy dit wurk opdrage kinne; ₄dan sille wy trochgean mei it gebed en it betsjinjen fan it Wurd. ₅Dat útstel foel der wakker yn by de hiele gearkomste; dat se keazen Stefanus, in tige leauwich man, fol fan ’e hillige Geast, en Filippus, Prochorus, Nikanor, Timon, Parmenas en Nikolaos, in man út Antiochië, dy’t Joad wurden wie; ₆dy brochten se foar de apostels, en dy dienen in gebed en leinen harren de hannen op.

₇It Wurd fan God naam fuortgong, it tal learlingen yn Jeruzalem wûn tige oan; ek in grut tal prysters joech him oer oan it leauwen.

₈Stefanus, fol fan genede en krêft, die grutte wûndertekens ûnder it folk. ₉Doe begûnen guon út ’e saneamde synagoge fan ’e Libertinen, Cyreneeërs en Alexandrinen en fan de lju út Cilicië en Asia te hottefyljen mei Stefanus, ₁₀mar se koenen it net hâlde tsjin de wysheid en de Geast dy’t yn him oan it wurd kamen. ₁₁Doe stokelen se mannen op om te sizzen: Wy hawwe him lastertaal útslaan heard tsjin Mozes en tsjin God. ₁₂En se hisen it folk en de âldsten en skriftgelearden op; se oerfoelen him, sleepten him mei en brochten him foar de Hege Rie; ₁₃se lieten falske getugen foarkomme dy’t seinen: Dy man giet yn syn taspraken oan ien tried wei te kear tsjin dit hillich stee en tsjin de Wet; ₁₄wy hawwe him sizzen heard, dat Jezus de Nazoreeër dit plak ôfbrekke sil en de gebrûken feroarje, dy’t wy fan Mozes krige hawwe. ₁₅Alle leden fan ’e Hege Rie seagen him strak oan; syn gesicht feroare foar har eagen yn dat fan in ingel.