Tobit 11

₁De reis gong fierder, oant se ticht by de poarte fan Ninevé kommen wienen. Doe sei Rafael tsjin Tobías: ₂Witst noch wol, freon, hoest dyn heit achterlitten hast? ₃Lit ús op dyn frou foarútgean en it hûs yn oarder meitsje. ₄Nim de galle fan de fisk mei. Sa rûnen se dan foarút, mei it hûntsje achter harren oan. ₅Anna siet de wei oer te sjen dêr’t har soan lâns weromkomme moast. ₆Se seach him oankommen en sei tsjin de heit: Sjoch, dêr komt dyn soan oan en de man dy’t mei him gien is, ek.

₇Rafael sei: Ik bin der wis fan, dat dyn heit aansens wer sjen kin. ₈Smar de galle op syn eagen en as dat begjint te biten, wriuwt er deryn, de wite plakken falle der dan ôf en hy kin wer sjen.

₉Anna kaam op harren ta rinnen en foel har soan om ’e hals. Se sei: No’t ik dy wer sjoen haw, myn jonge, kin ik stjerre. En se skriemden allebeide.

₁₀Tobit woe ek de doar út komme, mar hy stjitte dêrtsjin oan. ₁₁De soan fleach op him ta, pakte syn heit beet, smarde him de galle op ’e eagen en sei: It komt wol goed, heit. ₁₂Doe’t de eagen begûnen te biten, wreau er deryn en de wite plakken foelen der by de eachhoeken as skilen út. ₁₃Hy seach syn soan, foel him om ’e hals en sei mei triennen yn ’e eagen: ₁₄Heech te priizjen binne Jo, God, en prize is jo namme oant yn ivichheid. Te priizjen binne al jo hillige ingels. Jo hawwe slein, mar wienen ek barmhertich. Ik sjoch Tobías, myn soan, mei eigen eagen.

₁₅Syn soan gong yn ’e hûs, tige bliid, en fertelde syn heit fan ’e wûnderbaarlike dingen dy’t er yn Medië belibbe hie. ₁₆Doe gong Tobit syn skoandochter temjitte. Hy wie tige bliid en op wei nei de poarte fan Ninevé prize er God. Dy’t him rinnen seagen, ferwûnderen har deroer, dat er sjen koe. Tobit sei harren, dat er it oan God te tankjen hie. Dy hie barmhertich foar him west.

₁₇Doe’t Tobit by Sara kaam, syn skoandochter, segene er har en sei: Wês wolkom, dochter. Heech te priizjen is God, dy’t jo by ús brocht hat, prize binne ek jo heit en mem.

₁₈En it wie feest foar de hiele famylje yn Ninevé. ₁₉Achikar wie der ek, en syn neef Nadab. Sân dagen lang fierden se Tobías syn brulloft, allegear like fleurich.