Jezus Sirach 12

₁Ast ien goed dochste, wit wol oan wa’st it dochste,

dan sille se dy tankje foar dyn woldieden.

₂Doch de fromme goed, it sil dy leanne wurde,

is it net troch himsels, dan troch de Allerheechste.

₃It komt net goed mei immen dy’t allegeduerigen kwea docht,

likemin mei ien, dy’t noait wat oan ’e earmen jout.

₄Jou oan ’e fromme, mar help de sûnder net.

₅Doch de nederige goed, mar jou de goddeleaze neat;

ûntkear him syn brea en jou it him net,

oars soed er dy dêrtroch oermânsk wurde kinne;

do soest dûbeld en dwers kwea ûnderfine

foar alle goeds datsto him oandochste.

₆Want de Allerheechste hatet sûnders

en Hy wreekt Him op ’e goddeleazen.

₇Jou oan in goed minske, mar help de sûnder net.

₈Salang’t it jin goed giet, ken men de freon der net út,

mar by tsjinstuiten bliuwt it net geheim, wa’t jins fijân is.

₉As it jin goed giet, hat jins fijân fertriet,

mar by tsjinstuiten lit sels in freon jin sitte.

₁₀Fertrou dyn fijân yn der ivichheid net,

want syn gemienens is as koper dat útslacht.

₁₁Ek al is er dimmen en rint er mei de holle foardel,

tink om dysels en wês op dyn iepenst foar him,

dan bisto foar him as ien dy’t in spegel opwreaun hat,

en do wurdst gewaar dat dy net altyd ruostich bliuwt.

₁₂Set him net njonken dy del,

oars reaget er dy noch oan ’e kant en nimt dyn plak yn.

Jou him gjin sit oan dyn rjochterhân,

hy koe ris besykje om op dyn plak sitten te gean.

Dan soest op it lêst myn wurden begripe

en wroeging hawwe ast oan myn útspraken weromtinkst.

₁₃Wa hat begrutsjen mei de beswarder, as de slange him byt?

of mei al dy lju dy’t mei wylde dieren omgeane?

₁₄Sa giet it ek mei him dy’t him mei in sûndich man ôfjout

en dy’t him ynlit mei syn kweade oanslaggen.

₁₅In skoftlang bliuwt er by dy;

mar ast it paad bjuster rekkest, hâldt er it net fol.

₁₆Mei de mûle praat dyn fijân wakker moai,

mar yn syn hert is er fan doel, dy yn in dobbe te smiten.

₁₇As dy wat oerkomt, silst sjen, dat hy der earder by is as dosels

en as soed er dy helpe, sa lichtet er dy de foet.

₁₈Hy skodhollet en hantsjeklapt,

hy flústert wakker yn himsels en ferlûkt syn gesicht.