Iepenbiering 13

₁Doe seach ik in beest út ’e see opkommen, mei tsien hoarnen en sân koppen; syn hoarnen sieten tsien diademen op, en op syn koppen stienen godslasterlike nammen. ₂It beest dat ik seach, like op in panter, mar syn poaten wienen as fan in bear, en syn bek as dy fan in liuw. En de draak droech him syn macht, syn troane en syn grutte folmacht oer. ₃Sa’t it my talike, wie ien fan syn koppen deadlik ferwûne, mar dy deadlike wûne waard dochs wer better, en de hiele wrâld rûn fol bewûndering achter it beest oan. ₄Hja ferearen de draak, omdat er syn folmacht oan it beest oerdroegen hie, en se ferearen it beest mei de wurden: Wa is opwoeksen tsjin it beest en wa doar de striid mei him oan? ₅Hy krige in mûle om te swetsen en om God te lasterjen, en hy mocht twaënfjirtich moanne lang syn gong gean. ₆Hy die de mûle iepen om God te lasterjen, om syn namme en wenplak te lasterjen en har dy’t yn ’e himel wenje. ₇Doe mocht er de hilligen be-oarlogje en it fan har winne, en hy krige it foar ’t sizzen oer alle stammen, folken en naasjes fan allerhanne taal. ₈Him sille ferearje alle bewenners fan ’e ierde, dêr’t de namme sûnt de grûnlizzing fan ’e wrâld net fan opskreaun stiet yn it libbensboek fan it Laam dat slachte is.

₉Wa’t earen hat, lit him hearre. ₁₀Wa’t in oar gefangen nimt, rekket sels yn gefangenskip; wa’t in oar mei it swurd deaslacht, dy moat sels mei it swurd deaslein wurde. Hjir komt it op it úthâlden en de trou fan ’e hilligen oan.

₁₁Doe seach ik in oar beest út ’e ierde opkommen, dat hie twa hoarnen lykas dy fan in laam, mar it spriek as in draak. ₁₂It oefent alle macht fan it earste beest foar dy syn eagen út. It soarget derfoar dat de ierde en har bewenners it earste beest oanbidde, dat better wurden wie fan syn deadlike wûne. ₁₃It docht grutte wûndertekens, ja, it lit fjoer út ’e himel op ’e ierde delkomme foar de eagen fan ’e minsken. ₁₄It bringt de bewenners fan ’e ierde op ’e doele troch de wûndertekens dy’t it dwaan mei foar it beest, want it bepraat de bewenners fan ’e ierde om in byld te meitsjen ta eare fan it beest, dat troch it swurd ferwûne en dochs wer libben wurden wie. ₁₅Doe mocht it it byld fan it beest ta libben bringe, dat it begûn te praten, en it soarge derfoar dat elk dy’t it byld fan it beest net fereare, fan kant makke waard. ₁₆En it soarget derfoar dat elkenien, lyts en grut, ryk en earm, frije en slaaf in merk op ’e rjochterhân of op ’e foarholle krijt, ₁₇en dat net ien keapje of ferkeapje kin, oars net as dy’t as merk de namme fan it beest of it getal fan syn namme draacht.

₁₈Hjir komt it op begryp oan. Dy’t ferstân hat, lit dy it getal fan it beest útrekkenje; want it is it getal fan in minske. Syn getal is 666.