Psalmen 98

Sjong de Heare in nij liet,

want Hy hat wûnders dien.

Syn rjochterhân hat Him heil brocht,

syn hillige earm oerwinning.

₂De Heare hat syn heil bekend makke,

oan ’e folken sjen litten hoe’t Er helpt.

₃Mei syn geunst en trou

hat Er it hûs fan Israel betocht;

alle ierdryks einen koenen

it heil fan ús God sjen.

₄Jûchje de Heare ta, do hiele ierde,

jûchje, jubelje en sjong psalmen.

₅Sjong de Heare psalmen by de liere,

by de liere mei lûd gesang.

₆By it lûd fan trompet en rammehoarn,

jûchje foar de Heare, de kening.

₇Lit de see brûzje mei wat deryn is,

de ierde mei wat derop wennet.

₈Lit de rivieren yn ’e hannen klappe,

de bergen mei-inoar jubelje

₉foar de Heare, want Hy komt

om de ierde te fonnisjen.

₁₀Hy sil it ierdryk rjochtfeardich fonnisje

en de folken alhiel neffens rjocht.