Psalmen 80

₂Harkje, Hoeder fan Israel,

Jo, dy’t Joazefs folk driuwe as in keppel skiep,

Jo, dy’t de kearûb-ingels as troan hawwe,

kom strieljend tefoaren

₃foar Efraïm, Benjamin en Manasse,

lit jo heldekrêft wekker wurde

en kom om ús te rêden.

₄Help ús oerein, o God,

lit jo antlit ljochtsje,

dat wy rêden wurde.

₅Heare Almachtich, oant hoelang baarnt jo grime,

wylst jo folk dochs biddende is?

₆Jo joegen har triennebrea te iten,

Jo lieten har triennen drinke by ’t amerfol.

₇Jo lieten de buorfolken om ús skodholje

en ús fijannen sloegen de spot mei ús.

₈God Almachtich, help ús oerein,

lit jo antlit ljochtsje,

dat wy rêden wurde.

₉In wynstôk hawwe Jo út Egypte losskuord,

folken hawwe Jo ferdreaun om him te plantsjen.

₁₀Foar him hawwe Jo romte makke,

dat er djip woartel skeat

en it lân alhiel besloech.

₁₁Bergen rekken dutsen ûnder syn skaad,

reuzeseders ûnder syn twigen.

₁₂Hy rikte mei syn ranken oan ’e see ta,

mei syn útrinders oant de Rivier.

₁₃Wêrom ha Jo syn muorren tebrutsen

en hoe kin elk dy’t foarby komt, him mar plôkje?

₁₄Wêrom frette de wâldswinen him op

en gnauwe wylde bisten him ôf?

₁₅God Almachtich, kom dochs werom,

skôgje del fan ’e himel en sjoch,

sykje dy wynstôk wer op,

₁₆dy stamme dy’t jo rjochterhân plante hat,

de soan dy’t Jo opbrocht hawwe.

₁₇Dy’t him as ôffal mei fjoer ferbaarnd hawwe,

lit dy troch it driigjen fan jo antlit fergean.

₁₈Mei jo hân rêste op ’e man oan jo rjochterhân,

op it minskebern, dat Jo opbrocht hawwe.

₁₉Dan sille wy fan Jo net ôfwike.

Jou ús it libben, dat wy jo namme oanroppe kinne.

₂₀Heare Almachtich,

help ús oerein,

lit jo antlit ljochtsje,

dat wy rêden wurde.