Psalmen 16

Hoedzje my, God, want by Jo sykje ik ûntwyk.

₂Ik sei tsjin ’e Heare: Myn Hear binne Jo,

myn rykdom; neat kin Jo belykje.

₃Oer de ôfgoaden fan it lân, dy hege machten,

dêr’t ik my alhiel oan ferslingere hie, sis ik:

₄By dy’t in oare god neirinne, sil it lijen oanwinne;

mei myn hannen sil ik har gjin offers bringe,

har nammen sil ik net iens op myn lippen nimme.

₅Jo, Heare, binne it taparte diel dat de lotsbeker my joech,

en Jo sille foar my bewarje wat my tafoel.

₆De mjitsnoeren binne foar my yn skoandere kontreien fallen,

ja, myn erfskip stiet my tige oan.

₇Sa priizje ik de Heare, dy’t my ried joech,

ja, by nacht warskôget myn binnenste my.

₈Ik hâld de Heare aloan foar eagen;

Hy is ommers oan myn rjochterhân,

ik sil net wifkje.

₉Dêrom hat myn hert wille

en myn binnenste jubelet;

ek myn lichem sil feilich wenje.

₁₀Want Jo litte myn libben net oan it deaderyk oer,

Jo litte jo fertrouweling de ûngrûn net sjen.

₁₁Jo leare my it libbenspaad;

in oerfloed fan freugde is deun by Jo,

leaflikens yn jo rjochterhân,

foar altyd.