Psalmen 103

Lit al wat yn my is de Heare loovje,

it djipste fan myn wêzen syn hillige namme priizje.

₂Lit al wat yn my is de Heare loovje,

en net ien fan syn woldieden ferjitte.

₃Al dyn sûnden ferjout Er,

fan al dyn kwalen makket Hy dy better.

₄Dyn libben keapet Er los út it grêf.

Hy kroanet dy mei geunst en erbarming.

₅Hy jout dy mear as sêd fan it goede,

dat dyn jonkheid komt werom as by in earn.

₆De Heare bringt heil

en dy’t fertrape wurde, docht Er rjocht.

₇Hy hat Mozes syn wegen bekend makke,

de Israeliten syn dieden.

₈Barmhertich en genedich is de Heare,

geduldich en fol fan geunst.

₉Hy sil net einleas stride,

Hy wol net ivich lilk bliuwe.

₁₀Hy docht ús net neffens ús sûnden

en ferjildt ús net neffens ús skuld.

₁₁Want sa heech as de himel is boppe de ierde,

sa heech stiet syn geunst oer dy’t Him freezje.

₁₂Sa fier as it easten leit fan it westen,

sa fier docht Er ús sûnden by ús wei.

₁₃Lykas in heit begrutsjen hat mei syn bern,

hat de Heare begrutsjen mei dy’t Him tsjinje.

₁₄Want Hy wit wol, wa’t wy binne,

Hy tinkt der wol om, dat wy stof binne.

₁₅De minske – syn dagen binne as gers,

as in blom yn it fjild, sa bloeit er.

₁₆Mar strykt de wyn der oerhinne,

dan is er al wei,

en op it plak dêr’t er stien hat,

kenne se him al net mear.

₁₇De geunst fan ’e Heare duorret ivich foar dy’t Him freezje,

en syn gerjochtichheid foar har bernsbern,

₁₈foar har dy’t it ferbûn yn eare hâlde,

oan syn oarders tinke en dy neikomme.

₁₉De Heare hat syn troan yn ’e himel set,

as kening hearsket Er oer alles.

₂₀Loovje de Heare, jim ingelen,

jim sterke helden, dy’t syn wil folbringe.

₂₁Loovje de Heare, al syn legers,

dy’t Him tsjinje en dogge wat Hy wol.

₂₂Loovje de Heare, al syn wurken,

yn alle oarden dêr’t Hy regearret.

Lit al wat yn my is de Heare loovje.