Spreuken 28

₁De sûnders naaie út, al sit gjinien har achternei,

mar rjochtfeardigen binne moedich as jonge liuwen.

₂Troch de ûntrou fan in lân begjinne gâns lju de baas te spyljen,

mar troch ien ferstannich en kundich man bliuwt der oarder.

₃In machthawwer dy’t de lytse lju fertrapet

is in stjalprein dêr’t gjin brea fan komt.

₄Dy’t gjin wet achtslane, priizje de sûnders,

mar dy’t wol acht jouwe op ’e wet, sitte harren dwers.

₅Ferkearde minsken hawwe gjin doel oer it rjocht,

mar dy’t de Heare sykje, hawwe oeral doel oer.

₆As in earme oprjocht syn paad giet,

is er better as in rike dy’t ferkearde wegen giet.

₇Dy’t him oan ’e wet hâldt, is in ferstannich soan,

mar dy’t it mei trochbringers hâldt, set syn heit foar skande.

₈Dy’t syn besit fermearderet troch rinte en woeker,

garret it op foar de man dy’t meilijen hat mei de earmen.

₉As immen net mear harkje wol nei de wet,

dan is sels syn gebed in ôfgriis.

₁₀Dy’t oprjochten op ’e ferkearde wei bringt,

falt yn syn eigen kûle,

mar ûnskuldigen ervje it goede.

₁₁Al is in ryk man wiis yn eigen eagen,

de earme dy’t ferstannich is, hat him wol troch.

₁₂As de rjochtfeardigen triomfearje, is der grut feest,

mar as ferkearde minsken oan ’e macht komme,

krûpe de minsken wei.

₁₃Dy’t syn sûnden stilhâldt is net gelokkich,

mar dy’t derfoar útkomt en se lit, fynt barmhertichheid.

₁₄Wat in gelok as in minske altyd hoeden is,

mar dy’t syn hert behurdet, falt yn it ûngelok.

₁₅In brinzgjende liuw en in roppige bear –

sa is it, as in ferkeardenien hearsket oer in swak folk.

₁₆In hearsker dy’t elkenien útknypt, hat in bytsje ferstân,

mar ien dy’t neat hawwe moat fan woeker, kriget mear libbensdagen.

₁₇As immen oer in moard ynsit dy’t er dien hat,

sil er flechtsje oan syn grêf ta; besykje him mar net fêst te hâlden.

₁₈Dy’t earlik syn paad giet, fynt help,

mar dy’t ferkearde wegen giet, komt ynienen te fallen.

₁₉Dy’t syn lân bebout, kriget de romte fan brea,

mar dy’t achter dingen fan neat oanjaget, krijt de romte fan earmoede.

₂₀In betrouber man is ryk oan segen,

mar dy’t te gau ryk wurde wol, sil syn straf net ûntgean.

₂₁De persoan oansjen is net goed,

en om in stik brea kin immen in misdiediger wurde.

₂₂In oergeunstich man longeret op rykdom

en hy wit net, dat de krapte oer him komme sil.

₂₃Dy’t in oar te plak set, wint lang om let mear tank

as ien dy’t flaaiket mei in glêde tonge.

₂₄Dy’t heit en mem bestelt en tinkt dat it gjin kwea is,

is in maat fan ’e misdiedigers.

₂₅Fan ynklauwerigens komt rûzje,

mar dy’t de Heare betrout, wurdt oerfloedich ferkwikt.

₂₆Dy’t syn eigen hert fertrout, is in dwaas,

mar dy’t mei wysheid syn wei giet, sil it wol rêde.

₂₇Dy’t de earme jout, kriget gjin krapte,

mar dy’t de eagen tichtknypt, wurdt slim ferwinske.

₂₈As ferkearden oan ’e macht komme, hâlde de minsken har beskûl,

mar as hja omkomme, winne de rjochtfeardigen oan.