Spreuken 11

₁Falske skealjes hat de Heare in ôfgriis fan,

mar in suvere weachstien is Him nei ’t sin.

₂As de heechmoed komt, komt de skande ek,

mar by de dimmene minsken is wysheid.

₃De earlikheid wiist de oprjochten it paad,

mar falskens docht trouweleazen de ûndergong.

₄Rykdom helpt net op ’e dei fan ’e grime,

mar gerjochtichheid rêdt fan ’e dea.

₅Gerjochtichheid sljochtet de wei foar de oprjochten,

mar de sûnder komt troch syn ferkeardens te fallen.

₆De gerjochtichheid rêdt de rjochtskepene,

mar trouweleazen wurde fongen yn har eigen begearlikens.

₇Mei de dea fan ’e sûnder giet de hope ferlern,

en de falske ferwachting rint op neat út.

₈De rjochtfeardige wurdt út ’e benaudheid rêden,

mar krekt oarsom komt de sûnder deryn te lâne.

₉Mei de mûle bringt de goddeleaze soms syn neiste om,

mar de rjochtfeardigen wurde troch kennis rêden.

₁₀By it lok fan ’e rjochtfeardigen jubelet de stêd

en by de ûndergong fan ’e sûnder is der wer jûchhei.

₁₁Troch de segen fan ’e rjochtskepenen giet de stêd foarút,

mar troch de mûle fan ’e sûnders wurdt se delhelle.

₁₂In man sûnder ferstân ferachtet syn neiste,

mar in man mei ynsjoch docht der it swijen ta.

₁₃In praatsjemakker ferriedt licht geheimen,

mar dy’t betrouber is hâldt de saak stil.

₁₄As der gjin lieding is, rekket it folk yn it neigean,

mar troch de romte fan riedslju is der rêding.

₁₅It is slim as men boarch wurdt foar in frjemd,

mar dy’t de hânslach mijt, dy is wis.

₁₆In oanfallige frou komt ta eare,

mar in ûnoprjochte frou bringt skande.

Luie minsken hawwe altiten te min,

mar warbere lju wurde ryk.

₁₇In sêftsedich man docht himsels goed,

mar in wreden-ien fernielt syn eigen lichem.

₁₈De sûnder makket winst dy’t der net op troch kin,

mar dy’t gerjochtichheid sieddet, is wis fan syn lean.

₁₉Lykas gerjochtichheid libben bringt,

sa bedarret ien dy’t it kweade wol, yn ’e dea.

₂₀Ferkearde herten hat de Heare in ôfgriis fan,

mar dy’t oprjocht har wei geane, dogge it Him tige nei ’t sin.

₂₁De hân derop, dat de ferkearde net sûnder straf bliuwt,

en dat de neiteam fan ’e rjochtfeardigen behâlden bliuwt.

₂₂In gouden ring yn in bargesnút,

dat is in kreaze frou sûnder ferstân.

₂₃Wat rjochtfeardigen begeare, bringt inkeld it goede,

mar dêr’t sûnders op hoopje, in skriklik oardiel.

₂₄Der binne minsken dy’t rejaal jouwe en dochs riker wurde

en oaren dy’t al mar sparje en dochs achterop reitsje.

₂₅Ien, dy’t in oar segenet, kriget sels mear as sêd,

en dy’t in oar drinke lit, sil sels ek drinke.

₂₆It folk ferflokt de man, dy’t it nôt achterhâldt,

mar segen komt del op ’e holle fan wa’t it ferkeapet.

₂₇Dy’t it goede foar hat, siket om Gods geunst,

mar dy’t kweadwaan wol, hellet it kwea oer him.

₂₈Dy’t op syn rykdom fertrout, komt te fallen,

mar de rjochtfeardigen sprute út as beamtegrien.

₂₉Dy’t syn hûs útsloere lit, sil stoarm ervje,

en de dwaas wurdt slaaf fan de wize.

₃₀De frucht fan ’e gerjochtichheid is in libbensbeam,

mar it ûnrjocht fernielt minskelibbens.

₃₁As de rjochtfeardige syn fertsjinne lean al kriget,

hoefollestemear dan de ferkearde man en de sûnder!