Markus 8

₁Doe’t der yn dy dagen wer ris in bulte minsken wienen en se sûnder iten sieten, rôp Er syn learlingen en sei: ₂It begruttet My om al dy minsken; se binne ommers al trije dagen by My en hawwe gjin iten. ₃As Ik har sûnder iten nei hûs gean lit, falle se der ûnderweis by del; guon fan harren komme fier wei. ₄De learlingen seinen tsjin Him: Wêr soe men hjir yn dizze iensume oarde brea weihelje kinne om har iten te jaan? ₅Hy frege harren: Hoefolle breaën hawwe jimme? Sân, seinen se. ₆Hy hiet it folk har op ’e grûn del te jaan. Doe naam Er de sân breaën, spriek it tankgebed út en joech se syn learlingen om se harren foar te setten. En dat dienen se. ₇Se hienen ek in stikmannich fiskjes. Nei it tankgebed liet Er har dy ek foarsette. ₈De minsken ieten en krigen sêd. Wat der oan stikken oerbleau, fandelen se byinoar, sân kuorfollen. ₉Der wienen sa’n fjouwertûzen man. Doe liet Er harren fuortgean. ₁₀Sels stapte Er fuort dêrnei mei syn learlingen yn ’e boat en kaam yn ’e kontreien fan Dalmanûta.

₁₁De Fariseeërs kamen ris en begûnen tsjin Him te iggewearjen en om Him te hifkjen, fergen se Him op in teken fan boppen. ₁₂Hy suchte djip en sei: Wat freget dit naasje om in teken? Dit sis Ik jimme: In teken krijt dit naasje net. ₁₃Doe liet Er harren stean, stapte yn en foer werom nei de oare wâl.

₁₄It wie har troch it sin gien brea mei te nimmen en sadwaande hienen se mar ien brea by har yn ’e boat. ₁₅Hy warskôge har: Tink derom, bliuw fan it gêst fan ’e Fariseeërs en dat fan Herodes ôf! ₁₆Mar hja praten der mei-inoar oer troch, dat se sûnder brea sieten. ₁₇Hy fernaam dat en sei: Wat sitte jim dochs te praten, dat jim gjin brea hawwe? Fersteane en begripe jim it dan noch net? Wol it der by jim dan noch net yn? ₁₈Jim hawwe eagen, mar sjogge net; jim hawwe earen, mar hearre net. ₁₉Witte jimme dan net mear, hoefolle kuorfollen brokken jim byinoar fandele hawwe, doe’t Ik de fiif breaën briek foar de fiiftûzen? Tolve, seinen se. ₂₀En hoefolle kuorfollen hawwe jimme gearfandele, doe’t Ik de sân breaën briek foar de fjouwertûzen? Sân, seinen se. ₂₁Doe sei Er tsjin harren: No, begripe jimme it dan noch net?

₂₂Se kamen yn Betsaïda. Doe’t se in bline man by Him brochten en fregen, oft Er him oanreitsje woe, ₂₃krige Er de bline by de hân, brocht him bûtende buorren, spuide him op ’e eagen, lei him de hannen op en die him de fraach: Sjochst al wat? ₂₄De man seach op en sei: Ik sjoch de minsken, ik sjoch se as beammen omrinnen. ₂₅Jezus lei him nochris de hannen op ’e eagen, en doe seach er dúdlik; hy wie wer better en koe alles fan fierôf sjen. ₂₆Jezus liet him nei hûs ta gean, mar sei: Net de buorren yn!

₂₇Jezus en syn learlingen gongen nei de doarpen om Caesaréa Filippy hinne. Underweis frege Er syn learlingen: Wa sizze de minsken, dat Ik bin? ₂₈Hja seinen: Johannes de Doper; oaren sizze: Elía; wer oaren: Ien fan ’e profeten. ₂₉Doe frege Er harren: Mar jimme, wa sizze jimme, dat Ik bin? Petrus antwurde: Jo binne de Kristus. ₃₀Jezus stie der tige by harren op oan om dêr mei gjinien oer te praten.

₃₁Doe begûn Er harren derfan op ’e hichte te bringen, dat de Minskesoan gâns lije moast en dat Hy troch de âldsten, de hegeprysters en de wetlearaars ferskopt wurde soe, deade wurde en mei trije dagen ferrize. ₃₂Planút sei Er harren dat. Doe helle Petrus Jezus nei him ta en ûnderstie Him deroer. ₃₃Mar Jezus kearde Him om, seach syn learlingen oan en lies Petrus it leksum: Fuort do, foar My wei, satan, do hast net yn ’t sin wat God wol, mar wat de minsken wolle.

₃₄Hy rôp it folk en syn learlingen by Him en sei: As ien My folgje wol, dy moat himsels weisiferje, syn krús opnimme en dwaan lykas Ik. ₃₅Want dy’t syn libben behâlde wol, dy sil it ferlieze; mar dy’t syn libben jaan wol om [My en] it evangeelje, dy sil it hâlde. ₃₆Wat jout it ommers, oft men de hiele wrâld wint, as jin dat op it libben komt te stean? ₃₇Want wat kin men jaan, dat de priis fan it libben wurdich is? ₃₈As ien him foar My en myn wurden skammet foar dit ûntrou en sûndich naasje oer, foar sa’n ien sil de Minskesoan Him skamje, as Hy kommen is yn ’e hearlikheid fan syn Heit mei de hillige ingels.