Mattéus 5

₁Doe’t Er de mannichte seach, gong Er de berch op; en nei’t Er sitten gien wie, kamen syn learlingen by Him. ₂Doe naam Er it wurd en learde harren:

₁₂Jubelje fan blidens, want grut sil jimme lean yn ’e himel wêze. Sa hawwe se ommers ek de eardere profeten ferfolge.

₁₃Jimme binne it sâlt fan ’e ierde. As it sâlt syn sâltens kwytrekke is, wêr kin men it dan wer sâlt mei krije? It doocht nearne mear ta as om op strjitte smiten en troch de minsken fertrape te wurden. ₁₄Jimme binne it ljocht fan ’e wrâld. In stêd dy’t op in berch leit, moat wol yn ’t each falle. ₁₅Ek stekt men gjin lampe op om dy ûnder de nôtmjitte te setten, mar men set him op ’e stander. Dan jout er ljocht foar elkenien dy’t yn ’e hûs is. ₁₆Sa moat jimme ljocht skine foar de minsken. Se moatte jimme goede dieden sjen en sa jimme Heit yn ’e himel ferhearlikje.

₁₇Tink mar net, dat Ik kommen bin om de wet en de profeten oan ’e kant te skowen. Ik bin net kommen om dy oan ’e kant te skowen, mar om se ta har doel te bringen. ₁₈Want wier, Ik sis jimme: Salang’t himel en ierde besteane, sil der net de lytste letter of ek mar in inkeld streekje fan skrast wurde, ear’t alles útkommen is. ₁₉Wa’t dêrom ien fan dizze foarskriften, al is it ek it lytste, oan ’e kant skoot en oaren leart dat ek te dwaan, dy sil de minste neamd wurde yn it himelske ryk. Mar wa’t se sels neikomt en dat oaren ek leart, dy sil grut neamd wurde yn it himelske ryk. ₂₀Ja, Ik sis jimme: As jimme godstsjinstigens net mear ynhâldt as dy fan ’e wetlearaars en Fariseeërs, tink dan mar net, dat jimme it himelske ryk yn komme.

₂₁Jimme hawwe heard dat tsjin ús foarâlden sein is: Do meist net deaslaan. Wa’t deaslacht, moat him foar it gerjocht ferantwurdzje. ₂₂Mar Ik sis jimme: Elk dy’t lilk is op syn broer, moat him foar it gerjocht ferantwurdzje. En wa’t syn broer útskelt foar stommeling, moat him foar de Hege Rie ferantwurdzje; en wa’t him ‘grutte gek’ neamt, dy fertsjinnet it hellefjoer.

₂₃As jo dus jo jefte nei it brânofferalter bringe en it komt jo dêr yn ’t sin, dat jo broer wat op jo tsjin hat, ₂₄lit dan jo jefte mar foar it brânofferalter lizze en meitsje it earst mei jo broer yn oarder. Kom dan werom en bring jo offer. ₂₅Salang’t jo noch ûnderweis binne mei jo tsjinpartij, moatte jo besykje mei him ta in akkoart te kommen. Oars kin it sa beslaan, dat er jo foar de rjochter bringt en dat dy jo oerleveret oan ’e wacht en dan komme jo yn it tichthús telâne. ₂₆En dit sis Ik jo: Dêr komme jo net út, foar’t jo de lêste sint betelle hawwe.

₂₇Jimme hawwe heard dat der sein is: Net troubrekke! ₂₈Mar Ik sis jimme: Elkenien dy’t begearich in frou opnimt, docht yn syn hert al oan troubrek. ₂₉As jo troch jo rjochtereach komme te fallen, lûk it út en smyt it fuort, want it is better ien lichemsdiel kwyt te wêzen, as mei in geef lichem yn ’e hel smiten te wurden. ₃₀En as jo troch jo rjochterhân komme te fallen, kap him ôf en smyt him fuort, want it is better ien lichemsdiel kwyt te wêzen as mei in geef lichem yn ’e hel smiten te wurden.

₃₁Der is ek sein: Wa’t fan syn frou skiede wol, moat har in skiedelbrief meijaan. ₃₂Mar Ik sis jimme: Elkenien dy’t fan syn frou skiedt – of it moat wêze om ûntucht – stjoert har op troubrek oan en de man dy’t mei sa’n ien trout, is in troubrekker.

₃₃Ek hawwe jimme heard, dat tsjin ús foarâlden sein is: Do meist gjin falske eed dwaan, mar do moatst foar de Hear dyn eden neikomme. ₃₄Mar Ik sis jimme: Doch hielendal gjin eed, swar net by de himel, want dat is de troan fan God; ₃₅net by de ierde, want dat is syn fuottebank, net by Jeruzalem, want dat is de stêd fan ’e grutte Kening. ₃₆Swar ek net by jo holle, want jo kinne net ien hier wyt of swart meitsje. ₃₇Nee, by jimme moat it sa wêze: ja is ja en nee is nee. Wat dêr oerhinne komt, komt fan ’e duvel.

₃₈Jimme hawwe heard, dat der sein is: In each foar in each, in tosk foar in tosk. ₃₉Mar Ik sis jimme: Ien dy’t dwers wol, moatte jimme net daliks oanfleane. Nee, as ien jo in slach jout op it rjochterwang, kear him dan ek it oare ta. ₄₀En as ien mei jo yn ’e pleit giet en jo pak opeasket, lit him dan ek jo oerjas nimme. ₄₁En as ien jo seit, dat jo ien kilometer mei him oprinne moatte, rin dan de helte fierder mei. ₄₂Freget ien jo om wat, jou it him dan, en as ien wat fan jo liene wol, wyn jo der dan net foarwei.

₄₃Jimme hawwe heard, dat der sein is: Do moatst dyn neiste leafhawwe en dyn fijân haatsje. ₄₄Mar Ik sis jimme: Haw jim fijannen leaf en bid foar elkenien dy’t jim ferfolget. ₄₅Dan earst binne jim wier bern fan jimme Heit yn ’e himel. Hy lit ommers syn sinne opgean oer goeden en tsjoeden. Hy lit it reine foar deugdsumen en dogeneaten. ₄₆Want as jimme allinne dy minsken leafhawwe dy’t ek jimme leafhawwe, wat foar fertsjinst sit dêr foar jimme yn? Dogge de tolgarders dat ek net? ₄₇En as jimme allinne in freonlike groet hawwe foar jim bruorren, wat foar bysûnders dogge jimme dan? Dogge de heidens dat ek net? ₄₈Jimme moatte dus foar elkenien goed wêze, lykas jimme himelske Heit dat is.