Rjochters 4

₁Doe’t Ehûd stoarn wie, dienen de Israeliten wer wat de Heare ferkeard achte. ₂Dat de Heare levere har oer oan kening Jabin fan Kanaän, dy’t yn Chasor regearre. Syn legeroanfierder wie Sisera en dy hâlde ta yn Charosjet-Haggojim. ₃Doe rôpen de Israeliten de Heare oan, want Jabin hie njoggenhûndert izeren striidweinen en hy hie de Israeliten al tweintich jier lang fûleindich ferdrukt.

₄No spriek Deboara yn dy tiid rjocht oer Israel. Hja wie profetes en de frou fan Lappidot. ₅Hja hâlde sitdei ûnder de palmbeam fan Deboara, dy’t tusken Rama en Bet-El stiet, yn it berchlân fan Efraïm. Dêr gongen de Israeliten nei har ta om rjocht. ₆Doe stjoerde se om Barak, de soan fan Abinoäm en rôp him út Kêdesj yn Naftaly. En hja sei tsjin him: Jo moatte witte, dat de Heare, de God fan Israel, hjitten hat: Sjoch datst op ’e Tabor komst, en nim tsientûzen man út ’e soannen fan Naftaly en Sebûlon mei. ₇Dan sil Ik Sisera, de legeroanfierder fan Jabin nei dy ta bringe by de beek Kisjon, mei syn weinen en syn soldatefolk en Ik sil har oan dy oerleverje. ₈Mar Barak sei tsjin har: As jo mei my geane, goed, mar as jo net mei geane, dan gean ik ek net. ₉Dêrop sei se: Ik sil wier wol mei jo gean. Mar dan sille jo op dizze tocht dy’t jo ûndernimme, gjin eare behelje. No sil de Heare Sisera oan in frou yn hannen spylje.

Doe gong Deboara oerein en reizge mei Barak nei Kêdesj. ₁₀Barak rôp dêrop Sebûlon en Naftaly byinoar te Kêdesj en tsientûzen man teagen achter him oan, en ek Deboara gong mei.

₁₁No hie Chêber, de Kenyt, him ôfsûndere fan ’e Keniten, de soannen fan Chobab, de sweager fan Mozes. Hy hie syn tinte opset by de terebint te Saänaïm by Kêdesj.

₁₂Doe’t Sisera ferteld waard, dat Barak, de soan fan Abinoäm, op ’e berch Tabor taset wie, ₁₃rôp er syn hiele macht striidweinen op, njoggenhûndert izeren striidweinen en alle folk dat er by him hie, en sette út Charosjet-Haggojim wei nei de beek Kisjon. ₁₄Doe sei Deboara tsjin Barak: Oerein! Want dit is de dei, dat de Heare Sisera oan jo oerlevere hat. De Heare giet ommers foar jo út! Dêrop kaam Barak mei tsientûzen man achter him oan, by de berch Tabor del. ₁₅De Heare brocht doe Sisera mei al syn weinen en syn hiele leger sa yn ûnstjoer foar Barak en it skerpe swurd, dat Sisera sprong fan ’e wein ôf en naaide rinnendewei út. ₁₆Mar Barak jage achter de weinen en it leger oan, oan Charosjet-Haggojim ta. It hiele leger fan Sisera sneuvele, der bleau net ien fan oer. ₁₇Sisera lykwols wie rinnendewei útnaaid nei de tinte fan Jaël, de frou fan Chêber, de Kenyt. It wie nammentlik frede tusken kening Jabin fan Chasor en it hûs fan Chêber de Kenyt. ₁₈Doe kaam Jaël nei bûten ta, Sisera yn ’e mjitte. Hja sei tsjin him: Hjirhinne, mynhear, hjirhinne nei my ta. Haw mar gjin noed. Dat hy sloech ôf, nei har ta yn ’e tinte en hja lei in tekken oer him hinne. ₁₉Hy sei tsjin har: Mei ik wat wetter, ik haw sa’n toarst. Hja die in molksek iepen en joech him te drinken en doe bestoppe se him. ₂₀Dêrnei sei er tsjin har: Gean yn ’e iepening fan ’e tinte stean en as der dan ien komt en jo freget: Is hjir ek ien? Sis dan: nee! ₂₁Doe’t er fan wurgens yn in djippe sliep fallen wie, krige Jaël, de frou fan Chêber, in hearring fan ’e tinte, gong súntsjes mei in hammer yn ’e hân nei him ta en sloech him de hearring troch de sliepen yn ’e grûn fêst. Sa stoar er. ₂₂Doe seach Jaël Barak, dy’t Sisera achternei siet en hja gong nei bûten ta, him yn ’e mjitte. Hja sei tsjin him: Kom hjir mar, dan sil ik jo de man sjen litte, dy’t jo sykje. Doe’t er der ynkaam, sjoch, dêr lei Sisera dea oer de grûn en de hearring hied er noch yn ’e sliepen. ₂₃Sa fernedere God dy deis kening Jabin fan Kanaän foar de Israeliten. ₂₄En de Israeliten krigen him der hieltyd fierder ûnder, dat op it lêst hienen se kening Jabin fan Kanaän ferneatige.