Efeziërs 3

₁Dêrom is it dat ik, Paulus, dy’t fêst sit om ’e saak fan Kristus [Jezus], foar jimme as heidenen..... ₂Jimme hawwe der dochs grif wol fan heard dat God it my jûn hat om syn genede oan jimme út te dielen. ₃God hat my it geheim troch iepenbiering te witten dien, sa’t ik hjirfoar yn it koart al skreaun haw. ₄As jimme dat lêze, kinne jimme foar it ferstân krije, dat ik in skerp ynsjoch haw yn ’e ferburgenheid fan Kristus. ₅Dy ferburgenheid is ûnder eardere generaasjes noait sa oan ’e minskebern te witten dien. Mar no hat God it troch de Geast iepenbiere oan syn hillige apostels en profeten: ₆De heidenen binne troch it bliid boadskip likegoed erfgenamten, likegoed yn it lichem opnommen en diele likegoed yn Gods tasizzing yn ’e persoan fan Kristus Jezus. ₇Fan dat bliid boadskip bin ik in tsjinstfeint wurden troch it geskink dat God my yn syn genede jûn hat troch it wurkjen fan syn macht.

₈Krekt oan my, de allerminste fan alle hilligen, hat God dy genede jûn: Ik mei oan ’e heidenen it bliid boadskip ferkundigje fan de net-te-bedjipjen rykdom fan Kristus ₉en foar allegearre oan it ljocht bringe hoe’t Gods ferburgen plan ta wêzen komt. Dat geheim hat fan ivichheid ôf ferburgen west yn God de Skepper fan alle dingen. ₁₀Mar no moat de tsjerke de wysheid fan God yn al syn ryk ferskaat te witten dwaan oan ’e machthawwers en autoriteiten yn ’e himelske kontreien. ₁₁Dat is neffens Gods ivich plan, dat Hy útfierd hat troch Kristus Jezus ús Hear. ₁₂Yn Him hawwe wy de frijheid om mei alle betrouwen nei God ta te gean, mei’t wy yn Him leauwe. ₁₃Ik bid dêrom, dat jimme net mismoedich wurde meie, omreden dat ik foar jimme lije moat. Dat lijen meie jimme grutsk op wêze.

₁₄Om dy reden bûch ik de knibbels foar de Heit, ₁₅fan wa’t alle mienskip yn himel en op ierde syn namme krijt. ₁₆Ik freegje Him om jimme te jaan, dat jimme troch syn Geast ynderlik tige fersterke wurde neffens syn oerfloedige hearlikheid, ₁₇dat Kristus Him nei wenjen set yn jimme hert troch it leauwen en dat jimme yn leafde woartele en grûndearre bliuwe meie. ₁₈Ik freegje dat jimme sa by steat wêze meie om mei alle hilligen te fetsjen, hoe lang en breed, hoe heech en djip syn leafde is ₁₉en de leafde fan Kristus kenne, dy’t alle kennisse te boppe giet. Sa wurde jimme fol oan alle folheid ta dy’t God jout.

₂₀God no, dy’t by steat is om ûnwittend folle mear te dwaan as wy oait freegje of betinke doare neffens de macht dy’t yn ús wurket, ₂₁Him mei de hearlikheid wêze yn ’e gemeente en yn Kristus Jezus oant yn alle geslachten fan ivichheid ta ivichheid. Amen.