Deuteronomium 25

₁As manlju skeel ûnderinoar hawwe en hja smite it foar it rjocht en hja wurde berjochte, dan moat de ûnskuldige frijsprutsen en de skuldige feroardiele wurde. ₂Is de skuldige ta slaggen feroardiele, dan moat de rjochter him oer de grûn lizze en him, wylst hysels derby is, slaggen jaan litte, safolle as er fertsjinne hat. ₃Fjirtich slaggen mei er him jaan litte en net mear. Soenen hja him noch slaggen dêroerhinne jaan, dan soed er foar dyn eagen fernedere wurde.

₄As in okse oan it terskjen is, meist him de bek net tabine.

₅As bruorren byinoar wenje en ien fan harren stjert sûnder in soan nei te litten, dan mei de frou fan ’e ferstoarne net bûten de famylje trouwe mei in frjemde man. Har mans broer moat by har komme en mei har trouwe en it sweagerhoulik mei har oangean. ₆De earste soan dy’t hja kriget, komt te stean op namme fan syn ferstoarne broer, dat dy syn namme net weiwurdt út Israel. ₇Hat dy man der lykwols gjin sin oan om syn skoansuster ta frou te nimmen, dan moat syn skoansuster nei de poarte gean, nei de âldsten en hja moat sizze: Myn sweager hat wegere syn broers namme yn Israel yn stân te hâlden. Hy wol it sweagerhoulik net mei my oangean. ₈De âldsten fan ’e stêd moatte him dan oproppe en mei him prate. Bliuwt er der lykwols by en seit er: Ik fiel der neat foar om mei har te trouwen, ₉dan moat syn skoansuster, wylst de âldsten derby binne nei him ta gean, lûk him in skoech fan ’e foet en spui him yn it gesicht. Dêrby moat hja ferklearje: Sa docht men mei de man dy’t syn broers hûs net bouwe wol. ₁₀En yn Israel sil dat neamd wurde: hûs fan ien dy’t de skoech útlutsen is.

₁₁As manlju slaande deilis mei-inoar binne en de frou fan de iene komt derby om har man te helpen tsjin ’e oare dy’t him slacht, en hja soe de hân útstekke en him by syn skamte beetpakke, ₁₂kapje har dan de hân ôf. Haw dan gjin meilijen.

₁₃Do meist yn dyn pong gjin twadderlei weachstiennen hawwe, in gruttenien en ien dy’t wat lichter is. ₁₄Yn dyn hûs meist gjin twadderlei efa ha, in gruttenien en in lytsenien. ₁₅Dyn wichten moatte geef en suver wêze en ek dyn mjitten moatte geef en suver wêze. Dan silsto lang libje op ’e grûn dy’t de Heare dyn God dy jout. ₁₆Want de Heare dyn God hat in ôfgriis fan elk dy’t soks docht, dy’t ûnrjocht bedriuwt.

₁₇Hâld yn oantinken wat Amalek dy ûnderweis by dyn úttocht út Egypte oandien hat. ₁₈Hoe’t hy, doest ûnderweis wiest, op dy ta kaam en dyn achterhoede oanfoel, dy’t wurch achter dy oankaam, wylst dosels ek ynein en ûngedien wiest, en hoe’t se God net frezen. ₁₉As dan de Heare dyn God dy yn it lân dat de Heare dyn God dy yn erfbesit jout, rêst jûn hat fan al dyn fijannen om dy hinne, dan moatsto it oantinken oan Amalek ûnder de himel wei útroegje. Ferjit dat net.