2 Samuël 23

₁Dit binne de lêste wurden fan David:

₈Dit binne de nammen fan Davids helden: Jisjbaäl, de Chakmonyt, wol nûmer ien fan de trije. Dy swaaide syn spear oer achthûndert, dy’t er yn ien kear fersloech. ₉Nei him kaam Elazar, de soan fan Dodo, de soan fan Achochy, ek ien fan ’e trije helden. Hy wie by David doe’t se de Filistinen útdagen. Dy hienen har dêr fersammele foar de striid, mar de Israeliten hienen har al tebeklutsen. ₁₀Mar hy bleau stean en sloech op ’e Filistinen yn oant syn hân sa wurch waard, dat dy oan it swurd fêstplakte. Sa soarge de Heare dy deis foar in grutte ferlossing. It folk kearde doe werom, him achternei, mar allinne om te plonderjen. ₁₁Nei him kaam Sjamma, de soan fan Agé, de Hararyt. De Filistinen hienen har ris fersammele te Lechy en dêr wie in stik lân ticht beset mei reade earte. It folk wie útnaaid foar de Filistinen, ₁₂mar hy sette him te war midden op it stik lân en wist it te behâlden. Hy fersloech de Filistinen en de Heare soarge foar in grutte ferlossing.

₁₃Trije út ’e tritich foarmannen wienen ris delkommen en kamen tsjin ’e rispinge by David yn ’e grot Adûllam, wylst in kloft Filistinen it kamp opslein hie yn ’e delling Refaïm. ₁₄David hâlde doe ta yn ’e berchfêsting yn ’e tiid dat der in Filistynske wachtpost yn Betlehem lei. ₁₅En David krige oanstriid en sei: Wa sil my wetter te drinken jaan út ’e put by de poarte te Betlehem? ₁₆Doe brieken dy trije helden troch it leger fan ’e Filistinen hinne en putten wetter út ’e put by de poarte fan Betlehem. Hja namen it mei en brochten it by David. Dy woe der lykwols net fan drinke, mar geat it út foar de Heare ₁₇en hy sei: Ik tink der net oer, Hear, dat ik soks dwaan soe. Dit is ommers it bloed fan ’e mannen, dy’t mei libbensgefaar dêr hinnegien binne. En hy woe der net fan drinke. – Dat hawwe dy trije helden dien.

₁₈Abisjai, de broer fan Joäb, de soan fan Serûja, wie de foarman fan dy trije. Hy swaaide syn spear oer trije hûndert fersleinen, dat hy krige namme ûnder de trije. ₁₉Ja, hy wie achtenearre ûnder de trije en waard har oanfierder. Mar oan ’e earste trije kaam er net ta.

₂₀Ek Benaja, de soan fan Jojada, ien fan in dapper man, út Kabseël, wie in man fan grutte dieden. Hy fersloech de twa soannen fan Ariël út Moäb. Hy gong ek nei in liuw ta yn syn hoale en sloech dy dea op in dei, dat der snie lei. ₂₁Fierder fersloech er in foarse Egyptner. Dy Egyptner hie in spear yn ’e hân, mar hy gong nei him ta mei in stôk, skuorde de Egyptner de spear út ’e hân en makke him dea mei syn eigen spear. ₂₂Dat hat Benaja, de soan fan Jojada, dien, dat hy krige namme ûnder de trije helden. ₂₃Hy waard achtenearre boppe de tritich, mar oan ’e earste trije kaam er net ta. David stelde him oan oer syn liifwacht.

₂₄Asaël, de broer fan Joäb, hearde ta de tritich; fierders Elchanan, de soan fan Dodo út Betlehem, ₂₅Sjamma, de Charotyt; Elika, de Charotyt; ₂₆Chêles, de Paltyt; Ira, de soan fan Ikkes, de Tekoyt; ₂₇Abiêzer, de Anatotyt; Mebûnnai, de Chûsatyt; ₂₈Salmon, de Achochyt; Maherai, de Netofatyt; ₂₉Cheleb, soan fan Baäna, de Netofatyt; Ittai, soan fan Ribai út Gibeä fan ’e Benjaminiten; ₃₀Benaja, de Piratonyt, Hiddai, út ’e beekdellings by Gaäsj; ₃₁Abialbon, de Arhatyt; Azmawet, de Barchûmyt; ₃₂Eljachba, de Sjaälbonyt; de soannen fan Jasjen; Jonatan, ₃₃(de soan fan) Sjamma, de Hararyt; Achiam, soan fan Sjarar, de Hararyt; ₃₄Elifêlet, soan fan Achasbai, soan fan in Maächatyt; Eliam, soan fan Achitofel, de Gilonyt; ₃₅Chesrai, de Karmelyt; Paärai, de Arbyt; ₃₆Jigai, soan fan Natan út Soba; Bany de Gadyt; ₃₇Sêlek, de Ammonyt; Macherai, de Beërotyt, de wapendrager fan Joäb, de soan fan Serûja; ₃₈Ira, de Jitryt; Gareb, de Jitryt; ₃₉Oeria de Hetyt. Mei-inoar sânentritich.