2 Keningen 15

₁Yn it sânentweintichste jier fan kening Jerobeäm fan Israel waard Azarja, de soan fan kening Amasja fan Juda, kening. ₂Hy wie sechstjin jier, doe’t er oan it regear kaam en hat twaënfyftich jier regearre te Jeruzalem. Syn mem hiet Jekolja en hja kaam fan Jeruzalem. ₃Hy die sa’t de Heare it hawwe woe, alhiel lykas syn heit Amasja. ₄Allinnich de offerhichten waarden net sljochte. Noch altyd slachte en offere it folk op ’e offerhichten. ₅De Heare rekke de kening, dat er oan syn stjerdei ta melaatsk wie; dêrom wenne hy yn ôfsûndering en de kening syn soan Jotam gong oer it paleis en bestjoerde folk en lân.

₆It fierdere fan ’e skiednis fan Azarja, alles wat er dien hat, dat stiet wol beskreaun yn it boek fan ’e kroniken fan ’e keningen fan Juda. ₇Azarja is rêst mei syn foarfaars. Yn ’e Davidsstêd begroeven se him by syn foarfaars en syn soan Jotam folge him op.

₈Yn it achtentritichste jier fan kening Azarja fan Juda waard Sekarja, de soan fan Jerobeäm, kening oer Israel te Samaria en hy hat seis moanne regearre. ₉Hy die net sa’t de Heare it hawwe woe, lykas syn foarfaars dien hawwe. Hy wykte net ôf fan ’e sûnden, dêr’t Jerobeäm, de soan fan Nebat, Israel ta brocht hie. ₁₀Sjallûm, de soan fan Jabesj, makke in gearspanning tsjin him en deade him, dêr’t elk by wie en waard sels kening foar him yn ’t plak.

₁₁It fierdere fan ’e skiednis fan Sekarja stiet beskreaun yn it boek fan ’e kroniken fan ’e keningen fan Israel. ₁₂Sa hie ommers it wurd fan de Heare west tsjin Jehû: Oan it fjirde geslacht ta sille dyn soannen op ’e troan fan Israel sitte. Sa is it ek bard.

₁₃Sjallûm,de soan fan Jabesj, waard kening yn it njoggenentritichste jier fan kening Oezzia fan Juda. Hy hat krekt in moanne te Samaria regearre. ₁₄Menachem, de soan fan Gady út Tirsa, triek op en kaam te Samaria. Hy sloech Sjallûm, de soan fan Jabesj, te Samaria dea en waard sels kening foar him yn ’t plak.

₁₅It fierdere fan ’e skiednis fan Sjallûm, de gearspanning dy’t er makke hat, dat stiet wol beskreaun yn it boek fan ’e kroniken fan ’e keningen fan Israel. ₁₆It wie doe, dat Menachem Tifsach fersloech mei al wat deryn wie en it gebiet dat derby hearde, want se hienen de poarte net iependien. Hy fersloech it en alle froulju dy’t swier wienen, liet er iepensnije.

₁₇Yn it njoggenentritichste jier fan kening Azarja fan Juda waard Menachem, de soan fan Gady, kening oer Israel en hy regearre tsien jier te Samaria. ₁₈Hy die net sa’t de Heare it hawwe woe. Hy wykte al syn libbensdagen net ôf fan ’e sûnden, dêr’t Jerobeäm, de soan fan Nebat, Israel ta brocht hie. ₁₉Kening Pûl fan Assyrië die in ynfal yn it lân. Menachem joech Pûl tûzen talinten sulver om him op syn hân te krijen, dat er it keningskip fêst yn hannen hâlde koe. ₂₀Menachem frege dat bedrach op by alle minsken mei jild yn Israel, om de kening fan Assyrië betelje te kinnen: fyftich sikkels sulver de man. Sadwaande is de kening fan Assyrië weromgien en net yn it lân bleaun.

₂₁It fierdere fan ’e skiednis fan Menachem, wat er dien hat, dat stiet wol beskreaun yn it boek fan ’e kroniken fan ’e keningen fan Israel. ₂₂Menachem is rêst mei syn foarfaars en syn soan Pekachja folge him op.

₂₃Yn it fyftichste jier fan kening Azarja fan Juda waard Pekachja, de soan fan Menachem, kening oer Israel te Samaria en hy hat twa jier regearre. ₂₄Hy die net sa’t de Heare it hawwe woe. Hy wykte net ôf fan ’e sûnden, dy’t Jerobeäm, de soan fan Nebat, Israel bedriuwe liet. ₂₅Syn adjudant, Pêkach, de soan fan Remalja, makke in gearspanning tsjin him en sloech him dea te Samaria yn ’e stins fan it paleis, hy en Argob en Arjé, mei help fan fyftich man út Gileäd. Nei’t er him deade hie, waard er sels kening foar him yn ’t plak.

₂₆It fierdere fan ’e skiednis fan Pekachja, alles wat er dien hat, sjoch, dat stiet wol beskreaun yn it boek fan ’e kroniken fan ’e keningen fan Israel.

₂₇Yn it twaënfyftichste jier fan kening Azarja fan Juda, waard Pêkach, de soan fan Remalja, kening oer Israel te Samaria. Hy hat tweintich jier regearre. ₂₈Hy die net sa’t de Heare it hawwe woe. Hy wykte net ôf fan ’e sûnden, dêr’t Jerobeäm, de soan fan Nebat, Israel ta brocht hie.

₂₉Yn ’e dagen fan kening Pêkach fan Israel kaam kening Tiglat-Pilêser fan Assyrië opsetten en naam Ijjon, Abel-Bet-Maäka, Janoäch, Kêdesj en Hazor, Gileäd en Galiléa, it hiele lân fan Naftaly. De befolking fierde er yn ballingskip nei Assyrië. ₃₀Hosjéa, soan fan Ela, makke in gearspanning tsjin Pêkach, de soan fan Remalja. Hy sloech him dea en waard sels kening foar him yn ’t plak yn it tweintichste jier fan Jotam, de soan fan Oezzia.

₃₁It fierdere fan ’e skiednis fan Pêkach, alles wat er dien hat, sjoch, dat stiet wol beskreaun yn it boek fan ’e kroniken fan ’e keningen fan Israel.

₃₂Yn it twadde jier fan kening Pêkach fan Israel, de soan fan Remalja, waard Jotam, de soan fan kening Oezzia fan Juda, kening. ₃₃Hy wie fiifentweintich jier, doe’t er oan it regear kaam en hy hat sechstjin jier regearre te Jeruzalem. Syn mem hiet Jerûsa en wie in dochter fan Sadok. ₃₄Hy die, sa’t de Heare it hawwe woe, alhiel lykas syn heit Oezzia dien hie. ₃₅Allinnich de offerhichten waarden net sljochte. Noch altyd slachte en offere it folk op ’e offerhichten. Hy wie de man dy’t de Boppepoarte fan it hûs fan de Heare boud hat.

₃₆It fierdere fan ’e skiednis fan Jotam, alles wat er dien hat, dat stiet wol beskreaun yn it boek fan ’e kroniken fan ’e keningen fan Juda. ₃₇Yn dy dagen begûn de Heare kening Resin fan Aram en Pêkach, soan fan Remalja, op Juda los te litten. ₃₈Jotam is rêst mei syn foarfaars en waard by syn foarfaars begroeven yn ’e Davidsstêd. Syn soan Achaz folge him op.