1 Johannes 1

₁Wat der fan it begjin ôf west hat, wat wy heard en mei eigen eagen sjoen hawwe, wat wy oanskôge en mei de hannen oanroerd hawwe oangeande it Libbenswurd, dat ferkundigje wy. ₂It libben is ferskynd, en wy hawwe it sjoen; wy getuge en ferhelje jimme fan it ivige libben, dat by de Heit wie en ús ferskynd is; ₃ja, wat wy sjoen en heard hawwe, dat ferhelje wy ek oan jimme, dat jimme ek mienskip mei ús hawwe meie. Wy hawwe dan wer mienskip mei de Heit en mei syn Soan, Jezus Kristus. ₄Dat wy dat skriuwe kinne, makket ús troch alles hinne bliid.

₅Dit is it boadskip dat wy fan Him heard hawwe en dat wy jimme oerbringe: God is ljocht, en yn Him is alhiel gjin tsjusternis. ₆As wy sizze dat wy mienskip mei Him hawwe, en wy sykje likegoed ús paad yn it tsjuster, dan lige wy en dogge net wat earlik is. ₇Mar as wy yn it ljocht ús paad geane, lykas Hy ek yn it ljocht ferkeart, foarmje wy in mienskip mei-inoar en it bloed fan Jezus, syn Soan, makket ús rein fan alle sûnde. ₈As wy sizze dat wy gjin sûnde hawwe, ferrifelje wy ússels en binne net earlik. ₉As wy foar ús sûnden útkomme, is Hy sa trou en rjochtfeardich, dat Er ús de sûnden ferjout en ús fan alle ûngerjochtichheid reiniget. ₁₀As wy sizze, dat wy net sûndige hawwe, litte wy Him foar in liger trochgean en syn wurd sprekke wy net.