1 Kroniken 18

₁Dêrnei rekke David mei de Filistinen yn ’e slach en hy brocht har derûnder en hy naam de Filistinen Gat en de plakken dy’t derby hearre, ôf. ₂Moäb fersloech er ek en sadwaande kamen de Moäbiten ûnder David en moasten se him skatting opbringe. ₃Fierders fersloech David Hadadêzer, de kening fan Soba, de kant fan Hamat út, doe’t dy opteach om syn macht oan ’e rivier de Eufraat te festigjen. ₄David naam him 11.000 weinen ôf en 7000 ruters en 20.000 man fuotfolk. David liet alle hynders de haksinen trochsnije, mar hûndert span hâlde er oer. ₅Doe kamen de Arameeërs fan Damaskus om kening Hadadêzer fan Soba te helpen, mar David fersloech fan ’e Arameeërs 22.000 man. ₆En David lei besetting yn Aram-Damaskus, dat de Arameeërs moasten har ûnder David deljaan en him skatting opbringe. Sa joech de Heare David de oerwinning by al wat er ûndernaam. ₇De gouden skylden dy’t fan Hadadêzer syn tsjinstfeinten west hienen, naam David mei nei Jeruzalem. ₈Ut Tibchat en Kûn, stêden fan Hadadêzer, naam David ûnwittend folle brûns mei. Dêr hat Salomo de brûnzen see, de pylders en it brûnzen gerei fan makke. ₉Doe’t kening Toû fan Hamat hearde, dat David it hiele leger fan kening Hadadêzer fan Soba ferslein hie, ₁₀stjoerde er syn soan Hadoaram nei kening David ta om him de groetenis te dwaan en him der lok mei te winskjen dat er mei Hadadêzer yn ’e slach west hie en him ferslein hie – it hie altyd oarloch west tusken Hadadêzer en Toû. Hadoaram hie allerhanne gouden, sulveren en brûnzen gerei by him. ₁₁Dat hat kening David ek oan ’e Heare wijd mei it sulver en it goud dat er alle folken ôfnommen hie: fan Edom, Moäb, de Ammoniten, de Filistinen en Amalek.

₁₂Fierders fersloech Abisjai, de soan fan Serûja, de Edomiten yn ’e sâltdelling: 18.000 man. ₁₃Hy lei besetting yn Edom en hiele Edom moast him ûnder David deljaan. Sa joech de Heare David de oerwinning by al wat er ûndernaam. ₁₄No wie David kening oer hiele Israel en hy regearre it hiele folk aloan neffens rjocht en gerjochtichheid. ₁₅Joäb, de soan fan Serûja, stie oer it leger en Josafat, de soan fan Achilûd, wie kânselier. ₁₆Sadok, de soan fan Achitûb, en Achimêlek, de soan fan Abjatar, wienen prysters en Sjawsja wie griffier; ₁₇Benaja, de soan fan Jojada, stie oer de Kretiërs en de Pletiërs; en David syn âldste soannen wienen de earsten nei de kening.